Maduro i bashkohet fatit të Sadamit të Irakut dhe Noriegës së Panamasë, si udhëheqësi i fundit i kapur nga SHBA-të

Pretendimi i Presidentit Donald Trump se Shtetet e Bashkuara kanë kapur homologun e tij venezuelian, Nicolas Maduro, dhe gruan e tij gjatë sulmeve "në shkallë të gjerë" ndaj Venezuelës, ka tronditur botën.

Zëvendëspresidentja e Venezuelës, Delcy Rodriguez, tha se qeveria nuk e di vendndodhjen e Maduros dhe gruas së tij, Cilia Flores.

Në një mesazh audio të transmetuar në televizionin shtetëror të shtunën, Rodriguez tha se qeveria po kërkonte prova se Maduro dhe Flores janë ende gjallë.

Zhvillimet që përshkallëzohen me shpejtësi, vijnë pas sulmeve të përsëritura vdekjeprurëse nga forcat amerikane në Detin e Karaibeve dhe në Oqeanin Paqësor lindor, ndaj atyre që Uashingtoni i pretendon se janë anije kontrabande droge, si dhe një sulmi ndaj një zone ankorimi për anije të dyshuara venezueliane që transportojnë drogë.

Kapja e raportuar e Maduros sjell në mendje epokat e mëparshme kur udhëheqës të tjerë, si ish-udhëheqësi ushtarak i Panamasë Manuel Noriega dhe ish-presidenti irakian Saddam Hussein, u kapën nga SHBA-të.

Manuel Noriega

Në një ndërhyrje tjetër të drejtpërdrejtë në Amerikën Latine, SHBA-të pushtuan Panamanë në vitin 1989 për të rrëzuar nga pushteti udhëheqësin ushtarak dhe de facto Manuel Noriega, duke përmendur mbrojtjen e qytetarëve amerikanë në Panama, praktikat jodemokratike, korrupsionin dhe tregtinë e paligjshme të drogës.

Përpara se të sulmonin Panamanë, SHBA-të paditën Noriegën për kontrabandë droge në Miami në vitin 1988, njësoj siç kishin shënjestruar edhe Maduron.

Noriega e detyroi Nicolas Ardito Barletta-n të jepte dorëheqjen në vitin 1985, anuloi zgjedhjet në vitin 1989 dhe mbështeti ndjenjat anti-amerikane në vend, përpara se të ndodhte operacioni.

Sulmi amerikan në Panama ishte në atë kohë operacioni më i madh luftarak amerikan, që nga Lufta e Vietnamit. Qeveria amerikane nxori justifikime të ndryshme për operacionin, të tilla si përmirësimi i gjendjes së panamezëve duke e çuar Noriegën në SHBA për t'u përballur me akuzat për trafik droge.

Megjithatë, kur gjenerali filloi të tregonte shenja se po bëhej më pak i përkushtuar ndaj planeve rajonale të SHBA-së, ai u shpall person non grata nga Uashingtoni.

Ai u gjykua sipas aktakuzës së Miamit, pasi u dërgua me aeroplan në SHBA dhe qëndroi i burgosur atje deri në vitin 2010, kur u ekstradua në Francë për t'u përballur me një tjetër gjyq. Franca më pas e dërgoi përsëri në Panama një vit më vonë.

Noriega vdiq në burg në Panama në vitin 2017, ku po vuante dënimin për krimet e tij.

Sadam Huseini

Presidenti irakian Sadam Husein u kap nga forcat amerikane më 13 dhjetor 2003, nëntë muaj pasi filloi pushtimi i Irakut i udhëhequr nga SHBA-të, bazuar në informacione të rreme se Bagdadi zotëronte armë të shkatërrimit në masë (WMD).

Ashtu si Noriega, Sadami kishte qenë për vite me radhë një aleat kyç i Uashingtonit, në rastin e tij, gjatë viteve të luftës Irak-Iran në vitet 1980 që vrau një milion njerëz.

SHBA-të gjithashtu pretenduan në përgatitje të luftës së vitit 2003, pa bazë, se Sadami mbështeti grupe të armatosura si al-Kaeda.

Megjithatë, asnjë armë shkatërrimi në masë nuk u gjet kurrë në vend.

Sadami u gjet i fshehur në një gropë pranë qytetit të tij të lindjes, Tikritit.

Ai u gjykua në një gjykatë irakiane dhe mori dënimin me vdekje, që çoi në ekzekutimin e tij me varje për krime kundër njerëzimit më 30 dhjetor 2006.

Juan Orlando Hernandez

Rasti i Hernandezit të Hondurasit tregon atë që disa vëzhgues, e konsiderojnë si një qasje hipokrite nga SHBA-të.

Hernandez u kap në shtëpinë e tij në Tegucigalpa në një operacion nga agjentët amerikanë dhe forcat hondurase në shkurt 2022 - vetëm disa ditë pasi ai la postin e tij si president i vendit të tij.

Në prill të vitit 2022, ai u ekstradua në SHBA për përfshirjen e tij të dyshuar në korrupsion dhe tregtinë e paligjshme të drogës, dhe në qershor të të njëjtit vit, ai u dënua me 45 vjet burg.

Megjithatë, Hernandez u fal nga Presidenti i SHBA-së Donald Trump më 1 dhjetor 2025.

Disa ditë më vonë, prokurori kryesor i Hondurasit lëshoi ​​një urdhër arresti ndërkombëtar për Hernandezin, duke intensifikuar trazirat ligjore dhe politike vetëm disa ditë pasi ish-lideri doli nga një burg i Shteteve të Bashkuara./ Al Jazeera.