Nigeri/ Të paktën 30 të vrarë gjatë sulmit ndaj një tregu, rrëmbehen disa persona

Të paktën 30 persona u vranë dhe disa të tjerë u rrëmbyen kur persona të armatosur sulmuan një treg në shtetin Niger të Nigerisë, tha policia të dielën.

Zëdhënësi i policisë, Wasiu Abiodun, tha se personat e armatosur, të quajtur në nivel lokal banditë, sulmuan tregun Kasuwan Daji në fshatin Demo rreth orës 16:30 të së shtunës duke djegur tezga dhe duke plaçkitur artikuj ushqimorë.

"Mbi 30 viktima humbën jetën gjatë sulmit dhe disa persona u rrëmbyen gjithashtu. Po vazhdojnë përpjekjet për të shpëtuar viktimat e rrëmbyera", tha Abiodun.

Dëshmitarët thanë se personat e armatosur mbërritën me motoçikleta dhe hapën zjarr pa dallim. Ata thanë se dhuna ishte pjesë e një serie bastisjesh që filluan të premten në fshatrat e afërta Agwarra dhe Borgu.

«Gratë dhe fëmijët nuk u kursyen», tha Dauda Shakulle, e cila u plagos ndërsa po ikte. «Nuk ka pasur prani të forcave të sigurisë që nga fillimi i sulmeve. Aktualisht po nxjerrim kufoma.»

Ushtria nigeriane nuk iu përgjigj menjëherë kërkesave për koment.

Sulmi ndodhi disa javë pasi persona të armatosur rrëmbyen më shumë se 300 fëmijë dhe stafin e një shkolle katolike në shtetin në Nigerinë qendrore. Viktimat u liruan pas gati një muaji në robëri.

Një banditizëm i tillë është përshkallëzuar në të gjithë Nigerinë veriperëndimore dhe qendrore, me grupe të armatosura që kryejnë vrasje masive dhe rrëmbime në komunitetet rurale. Forcat e sigurisë kanë luftuar për të përmbajtur dhunën pavarësisht operacioneve të vazhdueshme.

Dëshmitari Khalid Pissa tha se personat e armatosur sulmuan komunitetet në Kasuwan Daji, si dhe në Chukama dhe Shanga aty pranë. Pissa tha se numri i të vdekurve ishte 40./ Reuters.