Aksident i rëndë automobilistik në Nigeri, plagoset kampioni i boksit Anthony Joshua, dy persona humbin jetën

Boksieri i njohur britanik i peshave të rënda, Anthony Joshua, është përfshirë në një aksident të frikshëm automobilistik në Nigeri, ku sipas medieve lokale dy persona kanë humbur jetën, ndërsa ish-kampioni i botës ka pësuar lëndime të lehta.

Sipas raportimeve, Joshua, 36 vjeç, ishte pasagjer në automjetin që u përplas me një kamion të parkuar pranë një pike karburanti në autostradën e ngarkuar Lagos–Ibadan. Aksidenti ka ndodhur në një zonë me qarkullim të dendur, duke shkaktuar panik dhe mbledhjen e shumë qytetarëve rreth vendngjarjes.

Shërbimet e emergjencës mbërritën menjëherë, por për fat të keq dy persona u shpallën të vdekur në vend. Joshua është parë duke u larguar nga automjeti i dëmtuar, dukshëm i tronditur, por pa pasoja serioze për jetën. Deri tani nuk ka një komunikatë zyrtare nga përfaqësuesit e tij, por burime pranë boksierit konfirmojnë se gjendja e tij është e mirë.

Ngjarja vjen vetëm dhjetë ditë pas përballjes së shumëpërfolur me Jake Paul, të zhvilluar në Miami, ku Joshua e rrëzoi amerikanin në raundin e gjashtë, duke i shkaktuar edhe fraktura në nofull. Dueli u ndoq nga rreth 33 milionë shikues në Netflix dhe i siguroi Joshua-s një rikthim të bujshëm në qendër të vëmendjes.

Pas asaj ndeshjeje, dy herë kampioni i botës pritej të rikthehej në ring në Riad gjatë shkurtit ose marsit, ndërsa së fundmi kishte ndarë edhe imazhe nga pushimet, duke bërë shaka për formën e tij fizike. Autoritetet nigeriane po hetojnë shkaqet e aksidentit.