Si po e ndryshojnë jetën në Londër injeksionet për dobësim

Nga Josh Gabert-Doyon - FT/

Te Copperfield Tailors pranë stacionit Moorgate, babë e bir, Chris dhe Dean Coleman, po shkurtojnë shumë pantallona. Rritja e përdorimit të injeksioneve për dobësim te punonjësit e City-t ka qenë një ndihmë e madhe për biznesin e rregullimit të rrobave.

"Vijnë me valixhe plot rroba," thotë Dean, 45 vjeç. "Ti bie në peshë madje nga qafa dhe kyçet e duarve. Është një ndryshim në gjithë trupin."

Chris, 73 vjeç, thotë se i ka rregulluar edhe pantallonat e veta pasi provoi vetë ilaçin. "Jam me fat që mund t'i sjell vetë," shton ai, megjithëse pranon se e përdori vetëm tre muaj për shkak të shqetësimeve në stomak.

Pavarësisht efekteve të pakëndshmeanësore, rritja e përdorimit të ilaçeve si Mounjaro dhe Wegovy ka filluar të ndryshojë gradualisht jetën nëCity of London. Nga veshja e punës te zakonet e palestrës dhe eventet për beqarë, këto ilaçe po sjellin ndryshime të dukshme, teksa po përhapen nga bota e të famshmëve dhe e shumë të pasurve te punonjësit e zakonshëm të zyrave.

"Që nga fillimi i vitit 2025 kemi parë një rritje të qartë të recetave," thotë Gaurav Sabharwal, themelues dhe drejtor mjekësor i One5 Health, një klinikë private që ofron vlerësime për dobësim prej disa vitesh. Fillimisht të zhvilluara për trajtimin e diabetit, këto ilaçe imitojnë hormonin GLP-1 dhe veprojnë duke ulur oreksin, përmes çlirimit të insulinës në gjak.

Në NHS kushtet për përshkrimin e GLP-1 janë ende të rrepta, por shitësit online dhe klinikat private kanë ndihmuar në përhapjen e tyre. Një sondazh i YouGov në maj tregoi se 6 për qind e londinezëve kanë përdorur injeksione për dobësim. Në shtator, kompania e të dhënave farmaceutike IQVIA vlerësoi se rreth 2.4 milionë njerëz në të gjithë Britaninë po përdornin Wegovy dhe Mounjaro, shumica duke paguar vetë për shkak të mbulimit të kufizuar nga NHS-ja.

Disa zyra kanë filluar t'i ofrojnë këto ilaçe si pjesë të përfitimeve për punonjësit dhe sigurimeve private shëndetësore, përmes kompanive si Vitality. Stilistja Lisa Gillbe thotë se klientët e saj, kryesisht gra në poste drejtuese, avokate dhe profesioniste të teknologjisë në City, kanë nisur ta rishikojnë imazhin e tyre në punë pasi u janë përshkruar GLP-1.

"Ne i quajmë 'dyqanet Ozempic'," thotë ajo, duke iu referuar emrit tregtar të semaglutidit, i cili përdoret për diabetin e tipit 2 dhe jo zyrtarisht për dobësim. "Kanë filluar të përdorin ilaçe për humbje peshe dhe papritur u duhet një garderobë krejt e re," thotë Gillbe. "Është shumë punë." Ajo shton se humbja e peshës me GLP-1 është "një moment i madh në jetën e dikujt" dhe ka "ndikim të fortë në mënyrën se si njerëzit e shohin veten".

Injeksionet për dobësim kanë ndikuar edhe te jeta sociale pas punës. It's a Date, një shërbim takimesh të shpejta në City, thotë se ka parë ndryshime të mëdha fizike te disa pjesëmarrës. "Sillnin një energji tjetër në dhomë," thotë bashkëthemeluesi Ricardo Gato.

Por kërkesa e madhe për këto ilaçe ka ngritur edhe shqetësime për produkte të rreme dhe pasojat e mundshme të humbjes së shpejtë të peshës. Në gusht, Policia e City of London njoftoi për kapjen e ilaçeve të falsifikuara për dobësim që reklamoheshin online. Më herët këtë vit, drejtori mjekësor i NHS England paralajmëroi se këto ilaçe po përdoreshin "në mënyrë të papërshtatshme" si një "zgjidhje e shpejtë".

Edhe për ata që i marrin nga burime të autorizuara, ekziston rreziku i humbjes së muskujve dhe shtimit të shpejtë të peshës pas ndërprerjes. "Rikthimi i peshës është mjaft i fortë për shumicën e njerëzve," thotë Sean Murphy, shefi global i trajnerëve personalë te Ultimate Performance, një palestër luksoze pranë Liverpool Street dhe St Paul's.

Murphy paralajmëron gjithashtu se ulja e madhe e kalorive mund të çojë në humbje muskulore, gjë që është e rrezikshme sidomos për të moshuarit. "Duhet të kontrollosh ushqimin dhe të sigurohesh që të mos humbasësh muskuj. Duhet të marrësh mjaftueshëm proteina dhe të bësh ushtrime force," thotë ai. Ai shton se ndërgjegjësimi më i mirë për efektet e ilaçeve ka bërë që më shumë njerëz t'i kombinojnë ato me palestër të rregullt.

Sabharwal nga One5 Health thotë se po sheh edhe efekte pozitive në shëndetin publik. "Po vëmë re një ndryshim të qasjes drejt shëndetit parandalues, që është pikërisht ajo që i duhet vendit," thotë ai.

Për rrobaqepësit Chris dhe Dean te Copperfield, ndryshimi duket më së shumti në mënyrën se si sillen klientët. "Mund të kënaqen dhe të gjejnë rroba që u rrinë mirë, ose t'i bëjnë me masë," thotë Chris. "Kjo është gjë e mirë për ta." / Financial Times – Syri.net