Agjenda/ Kryeministri izraelit niset për në SHBA për t'u takuar me Trumpin

Kryeministri izraelit Benjamin Netanyahu u largua nga Tel Avivi të dielën për në SHBA, ku pritet të takohet me Presidentin Donald Trump dhe zyrtarë të tjerë, sipas mediave lokale.

Transmetuesi publik i Izraelit, KAN, tha se Netanyahu, bashkëshortja e tij Sara dhe një delegacion që e shoqëronte u larguan nga vendi “për një vizitë politike në Florida”.

Sipas zyrës së tij, kryeministri izraelit do të takohet me Sekretarin e Shtetit të SHBA-së, Marco Rubio, të hënën përpara se të takohet me Trump në rezidencën e tij Mar-a-Lago në orën 22:30 sipas kohës së Izraelit (20:30 GMT).

Zyra nuk zbuloi detaje të ditës së dytë të vizitës. Ndërkohë, e përditshmja izraelite Yedioth Ahronoth raportoi se të martën mund të takohet me zëvendëspresidentin e SHBA-së JD Vance.

Të mërkurën, Netanyahu është planifikuar të takohet me figura ungjillore amerikane përpara se të marrë pjesë më vonë në një aktivitet në një sinagogë në Miami me gruan e tij, ku pritet të marrin pjesë edhe anëtarë të Kongresit Amerikan dhe udhëheqës të komunitetit hebraik, sipas një deklarate nga zyra e tij.

Netanyahu do ta përfundojë vizitën të enjten, tha zyra.

Sipas raportimeve të medias, armëpushimi në Gaza dhe kalimi në fazën e dytë të marrëveshjes pritet të dominojnë axhendën e takimit Netanyahu-Trump.

Armëpushimi hyri në fuqi më 10 tetor, duke i dhënë fund luftës dyvjeçare izraelite që ka vrarë mbi 71,200 palestinezë, kryesisht gra dhe fëmijë, dhe ka plagosur më shumë se 171,200 të tjerë që nga tetori i vitit 2023./ AA.