Barcelona e konsideron Nathan Ake si opsionin kryesor për qendrën e mbrojtjes

Barcelona planifikon të forcojë mbrojtjen gjatë merkatos së janarit, ndaj është duke kërkuar një qendërmbrojtës të qëndrueshëm që mund të integrohet menjëherë në skuadër. Një nga emrat kryesorë që po shqyrtohet nga drejtuesit është Nathan Ake i Manchester City-t.

Sipas raportimeve të ‘Diario Sport’, klubi katalanas e konsideron holandezin si opsionin më të përshtatshëm në këtë moment, për shkak të eksperiencës së tij në Premier League dhe aftësisë për të luajtur në sistemet e ndryshme të mbrojtjes. Ake ka luajtur për skuadra të njohura si Chelsea dhe Manchester City dhe, megjithëse këtë sezon ka pasur vetëm 13 paraqitje dhe kryesisht ka qenë në stol, ai ka aftësinë të ofrojë stabilitet dhe siguri në qendër të mbrojtjes.

Sidoqoftë, sfida kryesore për Barcelonën qëndron te forma e transferimit: Manchester City është i interesuar ta shesë Ake-n vetëm përfundimisht, ndërsa Barça do të duhet të gjejë një marrëveshje që i përshtatet buxhetit të saj. Nga ana e tij, lojtari është i hapur për t’u transferuar në Spanjë, nëse negociatat mes klubeve ecin mirë.

Nathan Ake mund të ofrojë eksperiencë dhe qetësi, elemente të nevojshme për “blaugranat” në betejën për tituj në La Liga dhe Champions League.