Milani shton opsionet, Allegri rikuperon pothuajse të gjithë grupin, por mbetet dilema ‘Gabbia’

Pas zhgënjimit në ‘Riad’ për Superkupën, Milani sheh më në fund dritë në fund të tunelit. Massimiliano Allegri po përgatit sfidën e kampionatit ndaj Veronës me një skuadër pothuajse të plotë, një risi e mirëpritur në këtë fazë të sezonit. E vetmja mungesë e sigurt mbetet Santi Gimenez, i cili do të qëndrojë gjatë jashtë fushave pas ndërhyrjes në kyçin e këmbës.

E vetmja re që qëndron mbi Milanellon ka emrin Mattia Gabbia. Gjendja e mbrojtësit do të vlerësohet orët në vazhdim, ndërsa aktivizimi i tij mbetet në dyshim për shkak të traumës së hiper-ekstensionit në gjurin e majtë, të pësuar ndaj Sassuolos. Stafi teknik nuk ka ndër mend të rrezikojë një rikthim të parakohshëm. Në rast mungese, një tjetër mundësi do t’i jepet Koni De Winter, i cili ka pasur vështirësi në paraqitjet e fundit.

Lajmet më të mira vijnë nga sulmi. Krahas Pulisic do të rikthehet titullar Rafa Leao, i cili ka lënë pas dëmtimin dhe është gati për Veronën, një kundërshtar që i ka sjellë shpesh kënaqësi (3 gola dhe 4 asistime). Nkunku do të jetë gati nga pankina.

Në mesfushë, bashkë me Modric dhe Rabiot, do të startojë Fofana, një pikë ekuilibri në fazën mbrojtëse, ashtu si Saelemaekers, lojtar të cilin Allegri nuk e heq pothuajse kurrë nga formacioni. Pankina, më e pasur se javët e fundit, ofron alternativa si Loftus-Cheek, Jashari, Ricci dhe Estupiñan.

Ndeshja me Veronën do të jetë e fundit me emergjencë në sulm. Nga 2 janari, për transfertën ndaj Cagliarit, Allegri do të ketë në dispozicion edhe Niclas Füllkrug, edhe pse forma e tij do të vlerësohet ditët në vijim.