Polonia ngre avionët luftarakë ditën e Krishtlindjes! Një avion rus identifikohet mbi ujërat ndërkombëtare të Detit Baltik
Polonia ngriti në ajër avionë luftarakë të enjten, pasi zbuloi se një avion rus zbulimi që po fluturonte pranë hapësirës së saj ajrore, njoftuan autoritetet.
Komanda Operacionale e Polonisë shkroi në platformën X se avioni u identifikua mbi ujërat ndërkombëtare të Detit Baltik, u interceptua dhe u shoqërua jashtë zonës.
Komanda bëri të ditur se gjatë natës u konstatuan edhe incidente të tjera pranë kufirit lindor të Polonisë.
“Gjatë natës u vëzhguan hyrje në hapësirën ajrore polake të objekteve që vinin nga drejtimi i Bjellorusisë. Pas analizave të detajuara, u përcaktua se ka shumë të ngjarë të bëhej fjalë për balona kontrabande, që lëviznin në përputhje me drejtimin dhe shpejtësinë e erës,” thuhet në njoftim.
“Fluturimi i të gjitha objekteve u monitorua vazhdimisht nga sistemet e radarit. Për të garantuar sigurinë, një pjesë e hapësirës ajrore mbi Voivodinë e Podlaskies u mbyll përkohësisht për trafikun civil,” shtoi Komanda.
Autoritetet theksuan se nuk u konstatua asnjë kërcënim për hapësirën ajrore të Polonisë dhe se situata vijon të monitorohet.
Incidenti ndodh vetëm pak ditë pasi avionë polakë u ngritën sërish të martën, në kohën kur Rusia kreu sulme të gjera kundër Ukrainës. Autoritetet polake thanë se reagimi përfshiu edhe mbështetje nga aleatët e NATO-s, me avionë spanjollë që ndihmuan në patrullimin ajror dhe forca holandeze që ofruan mbështetje me sisteme të mbrojtjes ajrore.
Presidenti ukrainas Volodymyr Zelenskyy deklaroi se Rusia lëshoi më shumë se 650 dronë dhe mbi 30 raketa dy ditë para Krishtlindjes, duke goditur sektorin energjetik të Kievit dhe infrastrukturën civile.
“Fatkeqësisht, pati humbje jete. Në rajonin e Kievit, një grua u vra nga një dron rus. Një person u shpall i vdekur në rajonin e Khmelnytskyit. Në rajonin e Zhytomyr-it, një fëmijë katërvjeçar u vra pasi një dron rus goditi një ndërtesë banimi. Ngushëllimet e mia për familjet dhe të afërmit,” tha Zelenskyy.
“Ky sulm rus dërgon një sinjal jashtëzakonisht të qartë për prioritetet e Rusisë. Një sulm përpara Krishtlindjes, kur njerëzit thjesht duan të jenë me familjet e tyre, në shtëpi dhe të sigurt. Një sulm i kryer praktikisht në mes të negociatave që synojnë t’i japin fund kësaj lufte,” shtoi ai.
“Putini ende nuk mund ta pranojë se duhet të ndalojë vrasjet. Dhe kjo do të thotë se bota nuk po ushtron mjaftueshëm presion mbi Rusinë. Tani është koha për të reaguar. Rusia duhet të shtyhet drejt paqes dhe garantimit të sigurisë.” /FoxNews/