Ukraina thotë se fshatarët kufitarë rrëmbehen dhe çohen në Rusi

Pesëdhjetë e dy banorë të një fshati ukrainas janë çuar në Rusi nga forcat pushtuese në një bastisje ndërkufitare në fshatin Hrabovske, thonë autoritetet në Kiev. Trembëdhjetë ushtarë ukrainas u kapën gjithashtu në fshatin kufitar në rajonin verilindor të Sumy-t, ka raportuar BBC.

Sulmi ndodhi natën e së shtunës, kur rreth 100 trupa ruse sulmuan fshatin, tha Viktor Trehubov, një zëdhënës i Task Forcës së Përbashkët të Forcave ushtarake të Ukrainës.

Civilët u mblodhën fillimisht në një kishë dhe më pas u çuan përtej kufirit në Rusi, i tha ai BBC-së.
Ishte e pazakontë që forcat pushtuese të çonin civilë në Rusi përpara se të vendosnin një prani të fortë në territorin e pushtuar, shtoi ai.

Rusia deri më tani nuk ka komentuar për fatin e civilëve nga Hrabovske, por raportet nga Ukraina tregojnë se ata mund të jenë çuar në Belgorod, një qendër e madhe rajonale rreth 80 km brenda Rusisë.

“Nëna e miqve të mi është çuar atje. Nuk ka asnjë mënyrë për ta kontaktuar atë edhe pse u përpoqën”, tha Volodymyr Bitsak, një anëtar i këshillit rajonal të Sumy-t. “Për sa di unë, ata janë dërguar në qytetin e Belgorodit dhe po mbahen në një vend të panjohur.”

Nënkolonel Trehubov i tha BBC-së të martën në mbrëmje se luftimet ende vazhdonin në pjesën jugore të Hrabovske-s, por Deep State, një faqe interneti ukrainase që monitoron situatën në fushën e betejës, tha më vonë se fshati ishte pushtuar nga forcat ruse.