Drejtësia në Belgjikë nën presion nga trafikantët e drogës, rrezikon të kthehet në ‘narko-shtet’ me ekonomi ilegale, korrupsion e dhunë
Sistemi i drejtësisë në Belgjikë po përballet me presion në rritje, ndërsa gjykatat e mbingarkuara dhe burgjet e mbipopulluara, dëmtojnë përpjekjet për të luftuar krimin e organizuar të drogës, duke ngritur shqetësime se vendi po humbet terren në luftën e tij kundër rrjeteve të fuqishme të trafikimit, raportoi të mërkurën agjencia e lajmeve Belga.
Sipas raportit të lajmeve, pavarësisht rritjes së dhunës së lidhur me drogën, sistemi gjyqësor mbetet i penguar nga mungesa kronike e fondeve dhe problemet strukturore afatgjata, duke nxitur atë që ekspertët dhe zyrtarët e përshkruajnë si një ndjenjë në rritje të pandëshkueshmërisë.
Ministrja e Drejtësisë, Annelies Verlinden, ka kërkuar një financim shtesë prej 1 miliard eurosh (1.1 miliard dollarë) për të përforcuar sistemin, duke propozuar që gjysma të ndahet për operacionet e përditshme dhe gjysma tjetër për infrastrukturën.
Planet e saj përfshijnë dënime më të ashpra për bosët e drogës, testime të detyrueshme për drogë në burgje dhe masa që u kërkojnë të burgosurve të pasur të kontribuojnë në koston e burgosjes së tyre.
Ndërkohë, Ministri i Brendshëm Bernard Quintin ka shkaktuar polemika, duke sugjeruar vendosjen e mundshme të ushtrisë në qytetet kryesore për të luftuar përshkallëzimin e dhunës së lidhur me drogën.
Krimi i organizuar ka kërcënuar drejtpërdrejt edhe udhëheqësit politikë. Gjatë mandatit të mëparshëm legjislativ, një ministër i drejtësisë u detyrua të fshihej pasi mori kërcënime me vdekje të lidhura me rrjetet kriminale.
Përtej shqetësimeve për sigurinë, sistemi i drejtësisë në Belgjikë po përballet me mbipopullim të rëndë. Më shumë se 2,500 të dënuar janë aktualisht nën monitorim elektronik ose presin një qeli burgu.
Sipas shifrave të ndara nga sindikatat e stafit të burgjeve me agjencinë e lajmeve Belga, 499 të burgosur flenë në dysheme në 19 burgje, me problemin veçanërisht akut në Flandër.
Pavarësisht shpenzimeve publike për zbatimin e ligjit të krahasueshme me ato të vendeve fqinje, gjykatat dhe burgjet e Belgjikës japin rezultate më të dobëta, thonë analistët. Thirrjet për reforma strukturore dhe menaxhim të përmirësuar kanë vazhduar për vite me radhë, por ministrat e drejtësisë të njëpasnjëshëm nuk kanë arritur të ofrojnë zgjidhje të qëndrueshme.
Besimi i publikut në sistemin e drejtësisë po bie gjithashtu. Sipas Barometrit të Pestë të Drejtësisë, besimi në sistemin e drejtësisë të Belgjikës vazhdon të bjerë, me mezi gjysmën e popullsisë që shpreh besim. Besimi është më i ulët midis qytetarëve të klasës punëtore, ndërsa vetëm klasa e mesme e lartë tregon një shumicë të qartë besimi.
Brenda vetë gjyqësorit ka shqetësime. Një magjistrat që heton krimin e organizuar në Antverp paralajmëroi së fundmi se Belgjika rrezikon të bëhet një "narko-shtet" i karakterizuar nga ekonomi të paligjshme, korrupsion dhe dhunë./ AA.