FIFA heq dënimin për Al Nassr, skuadra e Ronaldos mund të bëjë përforcime në janar

Lajme të mira për Cristiano Ronaldon, João Félix-n, trajnerin Jorge Jesus dhe skuadrën e Al Nassr. Vetëm tri ditë pas njoftimit se klubi saudit nuk mund të regjistronte lojtarë të rinj për shkak të një borxhi prej 9 milionë eurosh ndaj Manchester City-t për transferimin e Aymeric Laporte, FIFA ka vendosur ta heqë masën, duke lejuar Al Nassr të bëjë transferime në merkato dimërore.

Sipas ekspertit të transferimeve, Fabrizio Romano, vendimi përfundimtar është marrë të hënën, pasi borxhi ndaj City-t, që kishte lidhje me Laporte-n, tashmë është shlyer. Laporte ka luajtur për Al Nassr nga vera e 2023 deri në 2025 dhe tashmë është rikthyer te Athletic Bilbao.

Klubi ka planifikuar ndryshime në skuadër gjatë sezonit, me prioritet largimin e portierit brazilian Bento, për të krijuar hapësirë për një lojtar të huaj në një pozicion më sulmues.

Megjithatë, Jorge Jesus do të përballet me mungesa të rëndësishme, pasi Mohamed Simakan është jashtë për të paktën katër javë për shkak të një dëmtimi në shpinë, ndërsa Iñigo Martínez mbetet i pasigurt për ndeshjen e ardhshme. Ky zhvillim hap mundësi për skuadrën të forcohet në janar dhe të synojë titujt në Arabinë Saudite dhe AFC Champions League.