SHBA-të thirrje Kamboxhias e Tajlandës: Ndërpritni armiqësitë dhe zbatoni marrëveshjet e paqes

SHBA-të i bënë thirrje të dielën Kamboxhias dhe Tajlandës që të ndërpresin luftimet dhe të zbatojnë plotësisht Marrëveshjet e Paqes të Kuala Lumpurit, pas përleshjeve të fundit përgjatë kufirit të tyre të diskutueshëm.

"Shtetet e Bashkuara vazhdojnë t'u bëjnë thirrje Kamboxhias dhe Tajlandës që t'i japin fund armiqësive, të tërheqin armët e rënda, të ndërpresin vendosjen e minave tokësore dhe të zbatojnë plotësisht Marrëveshjet e Paqes të Kuala Lumpurit, të cilat përfshijnë mekanizma për të përshpejtuar çminimin humanitar dhe për të adresuar çështjet kufitare", tha Departamenti i Shtetit në një deklaratë.

Gjithashtu, mirëpriti dhe një takim të planifikuar të hënën të ministrave të jashtëm të Shoqatës së Kombeve të Azisë Juglindore (ASEAN), "për të mbështetur Kamboxhian dhe Tajlandën në përmbushjen e plotë të angazhimeve të tyre për t'i dhënë fund këtij konflikti".

Të dy vendet nënshkruan një marrëveshje paqeje në tetor në Samitin e ASEAN-it në Kuala Lumpur të Malajzisë, në prani të Presidentit të SHBA-së Donald Trump dhe Kryeministrit të Malajzisë Anwar Ibrahim, por ajo u pezullua më vonë pasi ushtarët tajlandezë u plagosën rëndë në një shpërthim mine tokësore në një provincë kufitare.

Autoritetet tajlandeze thonë se 21 ushtarë tajlandezë dhe një civil janë vrarë gjatë përleshjeve të vazhdueshme, ndërsa Ministria e Brendshme e Kamboxhias tha se 18 civilë kamboxhianë u vranë dhe 78 të tjerë u plagosën.

Tajlanda tha gjithashtu se 33 civilë të tjerë u vranë si "efekte anësore të situatës"./ AA.