Lula shpreson për një marrëveshje BE-Mercosur në janar, pavarësisht hezitimit të minutës së fundit

Pas vonesës së përsëritur në finalizimin e marrëveshjes së tregtisë së lirë midis Bashkimit Evropian dhe katër vendeve të Mercosur, Presidenti i Brazilit, Luiz Inácio Lula da Silva, u bëri thirrje evropianëve të shtunën të tregojnë më shumë guxim dhe vullnet politik.

"Fatkeqësisht, Evropa ende nuk ka vendosur. Udhëheqësit evropianë kanë kërkuar më shumë kohë për masa shtesë për të mbrojtur bujqësinë", tha Lula në samitin e Mercosur në qytetin brazilian Foz do Iguaçu.

Ai shtoi se pa vullnetin politik dhe guximin e udhëheqësve, nuk do të ishte e mundur të përfundoheshin negociatat që kanë vazhduar prej 26 vitesh.

Lula: Meloni gati të nënshkruajë në janar

Vetëm të mërkurën, Lula i kishte lëshuar një ultimatum BE-së: “Nëse nuk e bëjmë tani, Brazili nuk do të bëjë një marrëveshje për sa kohë që unë jam president”, tha ai në një takim qeveritar.

Megjithatë, presidenti brazilian tani është tërhequr nga ky pozicion. Lula tha se kishte folur në telefon me kryeministren italiane Giorgia Meloni dhe ajo e siguroi se do të ishte gati të nënshkruante në fillim të janarit.

"Marrëveshja do të përfundojë dhe shpresoj se mund të nënshkruhet në muajin e parë të presidencës paraguaiane [të Mercosur] nga homologu im Santiago Peña", tha Lula. Peña është presidenti i Paraguait.

Shumica e nevojshme në BE nuk u materializua

Traktati fillimisht duhej të nënshkruhej në samitin në Brazil të shtunën. Megjithatë, Meloni njoftoi së fundmi, se nuk ishte ende gati të binte dakord për marrëveshjen e planifikuar me katër vendet: Brazilin, Argjentinën, Uruguain dhe Paraguain, që do të thotë se shumica e BE-së e kërkuar për nënshkrim nuk do të materializohej./ DPA News.