Shefja e inteligjencës në SHBA: Rusia s’ka kapacitet të pushtojë Ukrainën apo Evropën

Drejtoresha e inteligjencës kombëtare të SHBA-së tha të dielën se komuniteti amerikan i inteligjencës nuk vlerëson se Rusia ka kapacitetin për të pushtuar Evropën apo edhe Ukrainën.

Tulsi Gabbard i bëri këto komente në një postim në rrjetin social X, duke iu përgjigjur raportimeve që pretendojnë se komuniteti amerikan i inteligjencës mbështet pikëpamjet e BE-së dhe NATO-s se Rusia synon të pushtojë ose të marrë nën kontroll Evropën.

Ajo akuzoi atë që e quajti “shteti i thellë luftënxitës dhe mediat e tij propagandistike” se po përpiqen të minojnë përpjekjet e Presidentit të SHBA-së, Donald Trump, për të sjellë paqe në Ukrainë dhe Evropë, duke përhapur narrativa të rreme.

“Luftënxitësit e ‘Deep State’ dhe mediat e tyre propagandistike po përpiqen sërish të minojnë përpjekjet e Presidentit Trump për të sjellë paqe në Ukrainë, dhe në fakt në Evropë, duke pretenduar në mënyrë të rreme se ‘komuniteti amerikan i inteligjencës’ pajtohet dhe mbështet pikëpamjen e BE-së/NATO-s se synimi i Rusisë është të pushtojë apo të marrë nën kontroll Europën, me qëllim nxitjen e mbështetjes për politikat e tyre pro-luftës,” tha Gabbard.

Ajo theksoi se pretendime të tilla synojnë të krijojnë mbështetje publike për politika pro-luftës dhe të përshkallëzojnë konfliktin.

“E vërteta është se inteligjenca amerikane vlerëson se Rusia as nuk ka kapacitetin për të pushtuar dhe mbajtur nën kontroll Ukrainën, e jo më ‘të pushtojë dhe të okupojë’ Evropën,” shtoi ajo.