Venezuela denoncon pretendimet kolonialiste të Trump në OKB

Ambasadori i Venezuelës në OKB, Samuel Moncada, kritikoi të enjten pretendimet e fundit të Presidentit të SHBA-së, Donald Trump, në lidhje me burimet e vendit të tij, duke i quajtur ato një shkelje "monstruoze" të së drejtës ndërkombëtare.

Duke iu drejtuar sesionit të 80-të të Asamblesë së Përgjithshme të OKB-së në Ditën Ndërkombëtare Kundër Kolonializmit, Moncada kërkoi që Uashingtoni të respektojë Kartën e OKB-së.

Komentet e tij pasuan pohimet e Trump se burimet tokësore dhe të naftës së Venezuelës në fakt "i përkasin" SHBA-së dhe duhet të dorëzohen.

Diplomati e përshkroi retorikën e Shtëpisë së Bardhë, si një "fyerje groteske" ndaj normave të qytetëruara, duke sugjeruar se ajo përfaqëson një kthim në politikat imperialiste të shekullit të 19-të.

“Presidenti Trump synon ta kthejë kohën prapa dhe t’i imponojë Venezuelës një koloni”, i tha Moncada asamblesë. “Nuk ka asnjë instrument ligjor, që mund t’i bëjë ballë kësaj deklarate monstruoze.”

Moncada argumentoi se administrata Trump po imponon “kaos dhe shkatërrim” në marrëdhëniet ndërkombëtare, duke e karakterizuar kolonializmin si një “krim agresioni”.

Ai pohoi se kolonializmi tradicional është zëvendësuar nga "metoda të reja dhe të dëmshme" kontrolli.

Shkëmbimi diplomatik ndodhi në sfondin e një kërcënimi të drejtpërdrejtë ushtarak. Trump ka paralajmëruar se mosrespektimi i kërkesave të tij do të rezultonte në "marinën më të fuqishme në botë", që do të vendoste një bllokadë totale ajrore dhe detare ndaj kombit të Amerikës së Jugut.

Moncada shprehu gjithashtu solidaritet me rajonet e tjera, që ai i përshkroi se jetojnë nën "dominim të huaj", përfshirë Palestinën dhe Porto Rikon, dhe tha se kushte të tilla janë të papajtueshme me Deklaratën Universale të të Drejtave të Njeriut./ AA.