Nga shahu te diplomimi, njihuni me heroin e PSG-së që priti katër 11-metërsha në finale

Parisi ka një hero të ri dhe ai mban doreza. Matvej Safonov ishte protagonisti absolut i finales së Kupës Interkontinentale FIFA, duke i dhënë PSG-së trofeun pas fitores ndaj Flamengos në serinë e penalltive. Portieri rus përjetoi një mbrëmje historike, duke pritur katër nga pesë penalltitë e gjuajtura nga brazilianët dhe duke u kthyer në figurën kyçe të suksesit parizien.

Sipas të dhënave të Opta-s, Safonov është portieri i parë i PSG-së në shekullin XXI që arrin të ndalë katër penallti në një seri të vetme. Jo gabime të kundërshtarëve, por pritje të pastra dhe vendimtare, që u dorëzuan francezëve trofeun prestigjioz. Një paraqitje që konfirmon besimin e trajnerit Luis Enrique, i cili e konfirmoi titullar pavarësisht rikuperimit të Chevalier.

I lindur më 25 shkurt 1999, në të njëjtën ditë me Gianluigi Donnarumma-n, Safonov ka fituar konkurrencën e brendshme falë qetësisë, lojës me këmbë dhe, mbi të gjitha, aftësisë së jashtëzakonshme nga pika e bardhë. Një profil i veçantë edhe jashtë fushës: i apasionuar pas matematikës dhe shahut, me studime universitare në pedagogji, psikologji dhe komunikim.

Një mjeshtër i penalltive, që me gjakftohtësi dhe inteligjencë i dhuroi PSG-së një fitore për t’u mbajtur mend gjatë.