A mund të shkaktojë infarkt stresi i festave?

Gjatë festave, shumë njerëz përballen me stres dhe rrëmujë. Për shumë gra, jeta e përditshme bëhet edhe më e ngarkuar, gjë që mund të çojë në lodhje dhe stres të madh. Për më tepër, gratë shpesh i injorojnë shenjat e sëmundjeve të zemrës.

Sëmundjet e zemrës janë shkaku kryesor i vdekjeve si te gratë ashtu edhe te burrat. Në fakt, më shumë gra vdesin nga sëmundjet e zemrës sesa nga kanceri i gjirit. Kujdesi për shëndetin e zemrës përfshin shmangien e faktorëve të rrezikut, njohjen e simptomave dhe marrjen e trajtimit në kohë.

Faktorët e rrezikut për sëmundjet e zemrës

Faktorët tradicionalë përfshijnë kolesterolin e lartë, tensionin e lartë të gjakut, pirjen e duhanit dhe obezitetin. Por edhe faktorë të tjerë, si stresi, ankthi dhe depresioni, ndikojnë negativisht në shëndetin e zemrës.

Stresi psikologjik, si problemet familjare, humbja e një personi të dashur, sëmundjet e gjata apo ngjarjet e rënda, shpesh nënvlerësohet. Studimet tregojnë se depresioni dhe stresi i vazhdueshëm lidhen me rrezik më të lartë për infarkt dhe me rikuperim më të vështirë pas tij.

Si ndikon stresi në zemër?

Stresi emocional mund të rrisë tensionin e gjakut dhe nivelet e hormoneve të stresit, si kortizoli. Këto ndikojnë në rrahjet e zemrës dhe në enët e gjakut. Stresi shpesh çon edhe në zakone jo të shëndetshme, si ushqimi i tepërt, mungesa e aktivitetit fizik, pirja e alkoolit ose duhanit.

Në raste të rralla, stresi shumë i fortë afatshkurtër mund të shkaktojë një gjendje të quajtur “sindroma e zemrës së thyer”, e cila zakonisht është e përkohshme.

Simptomat e sëmundjeve të zemrës te gratë

Gratë mund të kenë dhimbje gjoksi, por shpesh shfaqin edhe simptoma të tjera si:dhimbje në qafë, nofull, shpinë ose bark, mungesë fryme,të përziera,djersitje,lodhje e pazakontë ose marramendje.

Si të menaxhoni stresin gjatë festave

Çelësi është vendosja e pritshmërive reale. Festat nuk duhet të jenë perfekte. Largoni gjërat që sjellin stres dhe jo gëzim.

Ndihmojnë gjithashtu:aktiviteti fizik,ushqimi i shëndetshëm,kufizimi i alkoolit,mospirja e duhanit,ushtrimet e relaksimit,dhe kontrolli i rregullt i shëndetit të zemrës. / Mayo Clinic – Syri.net