Kimmich nuk kënaqet me vendin e parë: Mbrojmë keq, duhet të përmirësohemi

Edhe pse Bayerni i Mynihut është i pari në Bundesligë me 38 pikë, nëntë më shumë se ekipi i dytë dhe me 51 gola të shënuar pas 14 ndeshjesh, Joshua Kimmich ka shprehur shqetësime për qëndrueshmërinë mbrojtëse të skuadrës. Mesfushori, në një intervistë për Sport BILD, theksoi se bavarezët kanë qenë në disavantazh në gjashtë nga tetë ndeshjet e fundit, duke treguar se ka aspekte për t’u përmirësuar.

“Në javët e fundit kemi qenë shumë shpesh në disavantazh. Gjithmonë ka situata që mund t’i mbrojmë më mirë, sidomos te goditjet e dënimit. Duhet të japim më pak raste: më pak kënde, më pak goditje dënimi, më pak hedhje nga ana. Duhet të përmirësohemi patjetër në këtë aspekt për të mos u gjetur shpesh në disavantazh”, tha Kimmich.

Lideri i mesfushës theksoi gjithashtu vështirësinë për të mbyllur ndeshjet herët, një tipar i Bayern-it në fillim të sezonit: “Në fillim shpesh kishim një avantazh të madh në pjesën e parë. Tani nuk po ia dalim aq shpesh. Në të ardhmen duhet të luajmë në mënyrë që të mbyllim ndeshjet më shpejt. Nëse nuk vendos ndeshjet, ato mbeten të hapura. Atëherë çdo gjë është e mundur në futboll, qoftë me një goditje dënimi, një pasim të gjatë apo një pasim perfekt”.

Kimmich bën thirrje që skuadra të përmirësojë koncentrimin mbrojtës dhe menaxhimin e momenteve kyçe të ndeshjes, për të forcuar kryesimin në Bundesliga dhe për të reduktuar rreziqet nga disavantazhet e përkohshme.