Luftimet mes Tajlandës dhe Kamboxhias vazhdojnë pasi Trump thotë se vendet janë dakord për armëpushim

Luftimet mes forcave ushtarake të Tajlandës dhe Kamboxhias kanë vazhduar edhe të shtunën, vetëm disa orë pasi presidenti i Shteteve të Bashkuara, Donald Trump, deklaroi se të dyja vendet kishin rënë dakord për një armëpushim.

Kryeministri i Tajlandës, Anutin Charnvirakul, bëri të ditur se i kishte komunikuar presidentit amerikan se një armëpushim do të ishte i mundur vetëm pasi Kamboxhia të tërhiqte plotësisht forcat e saj nga zona kufitare dhe të hiqte minat tokësore. Ai theksoi se Tajlanda do të vazhdojë operacionet ushtarake derisa të mos ekzistojnë më kërcënime ndaj territorit dhe popullsisë së saj.

Të dyja palët raportuan shkëmbime të vazhdueshme bombardimesh dhe zjarri artilerie përgjatë kufirit. Ministria e Mbrojtjes e Kamboxhias akuzoi Tajlandën për sulme ajrore ndaj ndërtesave civile dhe infrastrukturës, ndërsa autoritetet tajlandeze njoftuan për të plagosur civilë si pasojë e sulmeve me raketa nga pala kamboxhiane.

Sipas të dhënave zyrtare, të paktën 21 persona kanë humbur jetën dhe rreth 700 mijë banorë janë detyruar të evakuohen në të dyja anët e kufirit.

Presidenti Trump kishte deklaruar më herët gjatë javës se mund të ndalte përshkallëzimin e konfliktit përmes ndërhyrjes diplomatike. Pas bisedimeve telefonike me udhëheqësit e të dy vendeve, ai njoftoi se ishte rënë dakord për ndërprerjen e zjarrit dhe për rikthimin te marrëveshja e arritur në tetor, në praninë e tij.

Megjithatë, as Tajlanda dhe as Kamboxhia nuk konfirmuan zyrtarisht hyrjen në fuqi të një armëpushimi të menjëhershëm. Udhëheqja kamboxhiane deklaroi se do të vazhdojë luftimet për të mbrojtur sovranitetin kombëtar.

Konflikti është pjesë e një mosmarrëveshjeje të gjatë kufitare mes dy vendeve, e cila u përshkallëzua sërish në muajin korrik. Pavarësisht një armëpushimi të mëparshëm të ndërmjetësuar nga Shtetet e Bashkuara dhe Malajzia, të dyja palët kanë akuzuar njëra-tjetrën për shkelje të vazhdueshme të marrëveshjes.

Kufiri tokësor prej rreth 800 kilometrash mes Tajlandës dhe Kamboxhias është objekt kontestimi prej më shumë se një shekulli, që nga përcaktimi i tij nga autoritetet koloniale franceze në vitin 1907.