Romário ‘kërcënon’ yjet e sotëm të Brazilit për Botërorin 2026: Nëse nuk e fitojmë… jemi të mbaruar!
Romário ka ndezur rrjetet sociale me një postim të bujshëm dhe plot humor në Instagram, i cili u bë viral në pak minuta. Legjenda braziliane publikoi një imazh të gjeneruar me AI, ku shfaqet në një favela të Rio de Janeiros së bashku me Ronaldinhon, Zicon dhe Adrianon – të gjithë duke mbajtur në duar shkopinj bejsbolli, si të ishin gati të “ndëshkonin” brezin e ri të ‘Seleçãos’.
Përballë tyre, ulur në bordurë, shihen Neymar, Vinicius Jr, Rodrygo dhe Raphinha, me pamjen e nxënësve që po dëgjojnë qortimin e “profesorëve” të vjetër. Skena është krejtësisht satirike, por ndikimi në rrjet ka qenë i menjëhershëm.
Romário e shoqëroi foton me një mbishkrim akoma më gazmor:
“Nëse nuk e fitojmë… jemi të mbaruar.”
Reagimet nuk vonuan, me tifozët që e morën si një motivim të çmendur, por plot të qeshura, ndërsa Brazili synon të rikthehet te lavdia në Botërorin 2026.