'Do ta mbushim vendin me vëzhgues'/ Opozita bullgare: Dorëheqja hap rrugën për një Bullgari normale, presim zgjedhje të lira e të ndershme

Dorëheqja e fundit në skenën politike bullgare përbën “hapi i parë drejt bërjes së Bullgarisë një vend normal evropian”, deklaroi bashkëkryetari i “Ne Vazhdojmë Ndryshimin”, Asen Vassilev. Sipas tij, tani vendi duhet të përqendrohet te mbajtja e zgjedhjeve të lira dhe të ndershme.

“Kjo është një fitore për të gjithë qytetarët bullgarë. Nga tani e tutje fillon detyra më e vështirë – që Bullgaria të funksionojë për të gjithë qytetarët, e jo vetëm për një. Kjo do ta bënte atë një vend normal. Energjia qytetare arriti ta ndalonte këtë plan,” u shpreh Vassilev.

Edhe bashkëkryetari i “Po, Bullgarisë”, Ivajlo Mirçev, theksoi se koalicioni i tyre nuk do të marrë pjesë në asnjë konfigurim qeverisës brenda këtij Kuvendi Popullor, duke kërkuar zgjedhje të menjëhershme.

“Nëse dikush mendon se njerëzit me nofka do të blejnë përsëri vota, nuk do t’i lëmë të marrin frymë. Do ta përmbytim vendin me vëzhgues – qytetarë bullgarë që do të monitorojnë drejtësinë e zgjedhjeve. Nuk do të jetë si herët e tjera, kjo duhet të jetë e qartë,” tha Mirçev.

Nga ana e tij, bashkëkryetari tjetër i “Po, Bullgari”, Bozhidar Bozhanov, deklaroi se përgjegjësia për “përsëritjen e zgjedhjeve të parakohshme” bie mbi ata që, sipas tij, refuzuan ta izolojnë Peevskin dhe e çuan qeverinë drejt delegjitimimit të plotë.

“Ata e meritojnë atë që u ndodhi,” përfundoi Bozhanov.

Partia e Vassilev tani shihet si opozitë kundër qeverisë së Zhelyazkov dhe ai ka deklaruar se “Ne Vazhdojmë Ndryshimin” është opozitë dhe se qeveria aktuale është e dëmshme për Bullgarinë.  

Ata janë aktivë në nisma si mocionet e mosbesimit dhe protestat për të kërkuar ndryshim politik dhe zgjedhje të reja.