Komisioni i BE-së godet META-n me hetim antitrust pavarësisht presionit të SHBA-së
Gjigandi i teknologjisë dyshohet se ka abuzuar me pozicionin e tij dominues me rregullat mbi integrimin e WhatsApp me inteligjencën artificiale. Hetimi mund të tendosë më tej bisedimet BE-SHBA mbi çelikun dhe aluminin evropian, të cilat tashmë janë goditur nga tarifat e larta të SHBA-së.
Komisioni Evropian të enjten nisi një hetim antitrust ndaj Meta-s për shkak të politikës së saj të inteligjencës artificiale në WhatsApp.
Vendimi vjen vetëm 10 ditë pasi zyrtarët e tregtisë së Shteteve të Bashkuara vizituan Brukselin dhe paralajmëruan se tarifat ndëshkuese për çelikun dhe aluminin e Bashkimit Evropian mund të mbeten në fuqi nëse zbatimi i rregullave dixhitale që synojnë kompanitë e mëdha të teknologjisë nuk zbutet.
“Tregjet e inteligjencës artificiale po lulëzojnë në Evropë dhe më gjerë”, tha komisionerja e konkurrencës e BE-së, Teresa Ribera, duke mbrojtur hetimin.
“Ne duhet të sigurohemi që qytetarët dhe bizneset evropiane të mund të përfitojnë plotësisht nga ky revolucion teknologjik dhe të veprojmë për të parandaluar që operatorët dominues dixhitalë të abuzojnë me pushtetin e tyre për të lënë mënjanë konkurrentët inovativë.”
Shqetësime për dominimin në treg
Komisioni po heton një politikë të re të Meta-s që mund të bllokojë ofruesit e inteligjencës artificiale nga komunikimi me përdoruesit e WhatsApp, duke i dhënë potencialisht një avantazh shërbimit të inteligjencës artificiale të Meta-s.
Më herët këtë vit, Meta integroi sistemin e saj të inteligjencës artificiale në WhatsApp, duke përfshirë grupet e bisedave të menaxhuara nga bizneset.
Deri në tetor, bizneset mund të vendosnin robotë të inteligjencës artificiale në ato grupe për të trajtuar problemet e klientëve ose për të ofruar shërbime mbështetëse, por rregullat e reja të Metës mund të frenojnë integrime të tilla, duke ngritur shqetësime se kompania mund të abuzojë me pozicionin e saj.
Hetimi nuk u nis sipas Aktit të Tregjeve Dixhitale të BE-së, i kritikuar prej kohësh nga SHBA-ja, por ai prapëseprapë mund të ndërlikojë bisedimet BE-SHBA mbi tarifat deri në 50%. Administrata Trump e ka akuzuar Brukselin se po synon firmat amerikane dhe i ka quajtur gjobat e BE-së ndaj kompanive të teknologjisë një “taksë”.
Një zëdhënës i WhatsApp i hodhi poshtë pretendimet e BE-së si “të pabaza”.
“Shfaqja e chatbot-eve të inteligjencës artificiale në API-në tonë të biznesit vë një barrë në sistemet tona, të cilën ato nuk ishin projektuar ta mbështesnin”, tha zëdhënësi.
“Megjithatë, hapësira e inteligjencës artificiale është shumë konkurruese dhe njerëzit kanë qasje në shërbimet e tyre të zgjedhura në një numër mënyrash, duke përfshirë dyqanet e aplikacioneve, motorët e kërkimit, shërbimet e email-it, integrimet e partneriteteve dhe sistemet operative.”