Ndërron jetë ish-sulmuesi që fitoi Botërorin me Gjermaninë

Ish-kampioni i botës me Gjermaninë në vitin 1974, Dieter Herzog, ka ndërruar jetë.

Lajmi është bërë i ditur nga klubi i Bundesligës, Bajer Leverkusen ku futbollisti luajti për 7 vjet.

“Bajer mban zi për humbjen e Dieter Herzog. Kampioni i Botës i vitit 1974, i cili luajti për Leverkusen për shtatë vjet, vdiq në moshën 79 vjeç”, tha Leverkusen në një deklaratë.

Herzog përfaqësoi Gjermaninë pesë herë, duke u paraqitur në dy ndeshje në Kupën e Botës 1974, të cilën e fitoi skuadra e tij.

Ai gjithashtu luajti në ndeshjet kundër Jugosllavisë dhe Suedisë.

Gjermani gjithashtu bëri mbi 250 paraqitje në Bundesligë, duke shënuar 46 gola për Bajer dhe Fortuna Duseldorf.

Pas karrierës së tij si lojtar, Herzog punoi si vëzhgues për Leverkusenin.