Magazina me materiale ndërtimi përfshihet nga flakët pranë liqenit në Gjirokastër

Një zjarr ka përfshirë pasditen e sotme një magazinë pranë liqenit të Viroit në Gjirokastër, duke shkaktuar panik në zonë për shkak të tymit të dendur që u ngrit mbi godinë. Menjëherë pas njoftimit, në vendngjarje mbërriti grupi i zjarrfikësve, të cilët nisën menjëherë ndërhyrjen.

Sipas shërbimit zjarrfikës, flakët kishin përfshirë katin e dytë të magazinës ku ndodheshin materiale ndërtimi. Për shkak të tymit të fortë, ndërhyrja u krye me pajisje speciale AP3 me ajër, si dhe me fikëse pluhuri dhe ujë.

Falë reagimit të shpejtë dhe profesional të zjarrfikësve, zjarri u izolua plotësisht duke parandaluar përhapjen në pjesët e tjera të ndërtesës dhe në objektet përreth.

Fatmirësisht, nuk ka të lënduar, ndërsa dëmet janë vetëm materiale.

Autoritetet po punojnë për të zbuluar shkaqet e shpërthimit të zjarrit.