Kosovë – Zvicër, një rivalitet i ri që vazhdon: pesë përballje, shumë emocione

Kosova e mbyll rrugëtimin kualifikues për Botërorin 2026 me sfidën e madhe ndaj Zvicrës në stadiumin “Fadil Vokrri”. Dardanët e Sylvinho-s e kanë siguruar tashmë vendin në playoff, ndërsa Zvicra është praktikisht e kualifikuar direkt për turneun që do të zhvillohet në SHBA, Meksikë dhe Kanada.

Shanset që Kosova të kalojë direkt në Botëror janë minimale, pasi do të duhej një fitore me 6 gola diferencë, një mision pranë së pamundurës përballë një skuadre të kalibrit zviceran.

Bilanci i ndeshjeve: Zvicra kryeson, Kosova kërkon fitoren e parë

Sfida e së martës do të jetë përballja e pestë mes dy kombëtareve. Deri tani, avantazhi është në anën e Zvicrës, me 1 fitore dhe 3 barazime, ndërsa Kosova ende nuk ka shijuar sukses kundër helvetëve.

Përballja e parë: 29 mars 2018, miqësore në Zyrih

Ndeshja debutuese mes dy skuadrave u mbyll 1-1. Për Kosovën shënoi Milot Rashica, duke ngritur siparin e një rivaliteti të veçantë.

Euro 2024, ndeshja e parë:  9 shtator 2023

Një sfidë spektakolare që përfundoi 2-2, me Vedat Muriqin protagonist absolut falë dopietës së tij.

Euro 2024, ndeshja e kthimit: 18 nëntor 2023

Edhe një tjetër barazim, këtë herë 1-1, ku Muhamet Hyseni u dhuroi Dardanëve një pikë me shumë vlerë.

Botërori 2026, ndeshja hapëse: 5 shtator 2025

Zvicra mori fitoren e vetme ndaj Kosovës deri tani, një triumf bindës 4-0.

Sfida e pestë: atmosfera ndez “Fadil Vokrrin”

Mbrëmjen e sotme, në orën 20:45, Kosova do të kërkojë që të shkruajë historinë dhe të marrë fitoren e parë ndaj Zvicrës. Të besuarit e Fodës synojnë të mbyllin me moral të lartë këtë fazë, ndërsa publiku i Prishtinës pritet të krijojë një atmosferë elektrizuese.