Ish-gjyqtar i GJND-së: Prokurorët belgë mund të nisin hetime nëse shtetasit e tyre kanë lidhje me 'turistët snajperë' të Sarajevës
Prokurorët belgë mund të hapin një hetim mbi "turizmin e snajperëve", të dyshuar të kryer gjatë rrethimit të Sarajevës në vitet 1990 nëse shtetas belgë ishin të përfshirë, sipas ish-gjyqtarit ndërkombëtar Chris Van den Wyngaert, raportoi VRT News të hënën.
Komentet vijnë pasi prokurorët në Milano javën e kaluar nisën një hetim mbi pretendimet se shtetas të huaj të pasur paguan shuma të mëdha parash për të qëlluar mbi civilët në Sarajevë nga kodrat përreth gjatë Luftës së Bosnjës dhe se forcat serbe të Bosnjës organizuan "safari njerëzor" për vizitorët e pasur në Sarajevë.
Hetimi në Itali vjen pas një ankese të paraqitur nga gazetari dhe autori Ezio Gavazzeni, i cili kishte hulumtuar incidentet e dyshuara.
Mediat italiane raportuan më parë se disa shtetas italianë udhëtuan drejt kryeqytetit boshnjak gjatë rrethimit të Sarajevës për t'u bashkuar me njësitë snajperiste serbe dhe për të qëlluar mbi civilët për "argëtim". Sipas të përditshmes La Repubblica, burrat nuk ishin ushtarë, por "turistë lufte të ekstremit të djathtë radikal".
Duke folur për programin radiofonik De Ochtend, van den Wyngaert, e cila shërbeu për vite me radhë si gjyqtare si në Gjykatën Ndërkombëtare Penale (ICC) ashtu edhe në Tribunalin Ndërkombëtar Penal për ish-Jugosllavinë, tha se nuk kishte hasur kurrë prova të praktikave të tilla gjatë mandatit të saj.
"Nuk e besoja, ishte kaq e pabesueshme", tha van den Wyngaert.
"Kalova shtatë vjet në gjykatë dhe nuk kisha dëgjuar kurrë për këtë deri më tani. Thashethemet kanë ekzistuar për një kohë të gjatë, por ende nuk është gjetur asnjë provë", shtoi ajo.
Van den Wyngaert theksoi se nëse belgët ishin të përfshirë në krimet e dyshuara, ata nuk mund të gjykoheshin nga GJPN-ja, pasi gjykata nuk ekzistonte ende në atë kohë. Megjithatë, prokurorët belgë mund të fillonin ende hetimin e tyre.
Ajo vuri në dukje se, meqenëse autorët e dyshuar ishin civilë, veprimet nuk do të binin nën ligjet e luftës.
"Nëse bëhet fjalë për vrasje, veprat penale mund të jenë të parashkruara, por ato gjithashtu mund të konsiderohen krime kundër njerëzimit dhe ato nuk skadojnë", shpjegoi ajo.
Gjatë rrethimit 3 vjet e gjysmë, në të cilin forcat serbe rrethuan dhe bombarduan Sarajevën, u vranë më shumë se 11,500 civilë, përfshirë 1,601 fëmijë.
Gjatë Luftës së Bosnjës, forcat serbe, të mbështetura nga ushtria jugosllave dhe njësitë paraushtarake, nisën një fushatë spastrimi etnik kundër myslimanëve boshnjakë. Deri në fund të luftës, më shumë se 100,000 njerëz ishin vrarë dhe rreth 2 milionë të tjerë u detyruan të largoheshin nga shtëpitë e tyre./ AA.