VIDEO/ Kontrollet për vrasjen e Gilmando Danit/ Zbulohet arsenal armësh në Fushë Krujë, shpallet në kërkim pronari-EMRI

Ylli Zalla është pronari i arsenalit të armëve që u zbulua në zonën e Niklës, tre ditë pas atentatit në Rinas (11 nëntor), ku u vra Gilmando Dani dhe u plagos, Muçi Shaljani efektiv i AMP.

Gjatë kontrollit në një banesë në fshatin Zall, forcat policore zbuluan një arsenal të plotë armësh, eksplozivësh dhe municionesh, ndërsa pronari i banesës është shpallur në kërkim.

Operacioni vijon, ndërsa hetimet po thellohen për të zbardhur lidhjen e mundshme të 48-vjeçarit me ngjarjen e rëndë pranë Rinasit.

Njoftimi i Policisë:

Tiranë/Zhvillohet operacioni policor i koduar “Tracking”, nga specialistët e Sektorit të Krimeve të Rënda të DVP Tiranë, në bashkëpunim me shërbimet e Komisariatit të Policisë Krujë.

Operacioni, ende në vijim në rrethin Krujë, në kuadër të punës intensive hetimore dhe operacionale, me objektiv zbardhjen e autorësisë dhe rrethanave të ngjarjes së datës 12.11.2025, te rrethrrotullimi i Rinasit.

Zbulohet një banesë në fshatin Zall, Fushë Krujë, ku mbahej arsenal armësh shpërthyese, armësh zjarri dhe municioni.

Gjatë kontrolleve, u gjetën në këtë banesë:

-3 kallëpë tritol;

-12 granata dore sulmuese;

-sasi lëndësh plasëse gati për shpërthim, të montuara me kapsolla detonatore, fitil zjarrpërcjellës dhe celularë(mina);

-3 ndezës granatash, kapsolla detonatore dhe 5 celularë;

-4 armë zjarri (2 automatikë dhe 2 pushkë), 8 krehra dhe pjesë armësh;

-6000 fishekë të kalibrave të ndryshëm;

-2 kg e 25 gramë Cannabis.

Në vijim të veprimeve procedurale për rastin, u shpall në kërkim pronari i banesës, shtetasi Y. Z., 48 vjeç.

Punohet intensivisht për kapjen e tij, si dhe po hetohet me qëllim zbardhjen e lidhjes së mundshme që mund të ketë 48-vjeçari, me ngjarjen e ndodhur te rrethrrotulli i Rinasit.

Operacioni policor i koduar “Tracking”, vijon.

Materialet procedurale iu referuan Prokurorisë së Tiranës, për veprime të mëtejshme.