Këlliçi: Gjendja e mohimit dhe siguria në kolaps, Albana Koçiu duhet të japë dorëheqjen
Deputeti i Partisë Demokratike, Belind Këlliçi, ka reaguar ashpër ndaj deklaratave të Ministres së Brendshme, Albana Koçiu, pas raportimit të saj në Kuvend, ku minimizoi situatën kriminale në vend.
Ai thekson se "gjendja e mohimit dhe siguria janë në kolaps", duke iu referuar ngjarjes së rëndë të atentatit në Rinas, vetëm disa orë pas deklaratave të ministres.
Këlliçi akuzon Koçin për mohimin e realitetit dhe dështimin për të adresuar krimin e organizuar dhe korrupsionin në polici. Ai e quajti ministres dorëheqjen e domosdoshme, duke theksuar se "çdo orë më shumë në detyrë është një rrezik për qytetarët". Sipas tij, Shqipëria ka nevojë për një ndryshim të thellë në politikat e sigurisë dhe një ministër që pranon realitetin.
Postimi:
Gjendja e mohimit dhe siguria në kolaps!
Nuk kanë kaluar as 8 orë nga raportimi i Ministres së Brendshme, Albana Koçiu, në Komisionin e Punëve të Brendshme dhe të Mbrojtjes në Kuvend.
Në deklarimet e saj, ministrja demonstroi se ndodhej institucionalisht në gjëndjen e mohimit të situatës së rënduar kriminale në vend.
Ajo tha se “policia nuk rri dot në kuzhinë për të parandaluar që djali të godasë me thikë babanë, apo brenda në kuzhinën e restorantit për të parandaluar picerin të godasë më thikë kuzhinierin”.
Më tej, ministrja u zgjat mbi një orë duke folur mbi monopatinat dhe rrezikshmërinë e tyre.
Në një paradoks makabër, në të njëjtën ditë pak orë më pas ndodhi ngjarja e rëndë e Rinasit e cila jo vetëm ka tronditur opinionin publik, por ka ngritur edhe pikëpyetje serioze sa i takon sigurisë kombëtare në aeroportin e vendit, si dhe integritetit të strukturës policore, duke marrë parasysh se një ndër viktimat e atentatit është punonjës i AMP-së, nën varësinë e Ministres së Brendshme!
Në kontekstin e një ndjenje të thellë pasigurie tek qytetarët, kriminalizimi të policisë në çdo nivel, infiltrimi të strukturave kriminale në kupolën e institucioneve ligjzbatuese, nuk është gjëndja e mohimit zgjidhja për problemet e rënda të sigurisë dhe as loja me figurinat, duke ndërruar shpesh fytyrën e Ministrit të Brendshëm por jo substancën, mënyrën e të konceptuarit të punës.
Një ministri që ndjek parimin e tmerrshëm kryeministror “të hanë kokat e njëri tjetrit”, nuk i ofron dot kurrë shqiptarëve sigurinë që meritojnë.
Ministrja e Brendshme duhej të kishte dhënë tashmë dorëheqjen. Çdo orë e saj në detyrë, është një rrezik më shumë për jetën dhe sigurinë e qytetarëve.