Skandal i ri në futbollin turk: 1,024 lojtarë nën hetim për baste të paligjshme, përfshihet edhe FIFA

Futbolli turk po përballet me një prej krizave më të mëdha në historinë e tij. Federata Turke e Futbollit (TFF) ka njoftuar zyrtarisht se 1,024 futbollistë profesionistë janë referuar në Komitetin Disiplinor (PFDK), pas akuzave për përfshirje në aktivitete të paligjshme bastesh sportive.

Ky zhvillim vjen vetëm pak javë pas hetimeve ndaj më shumë se 500 gjyqtarëve sportivë, prej të cilëve 145 u pezulluan për shkelje të ngjashme. Sipas TFF-së, veprimet disiplinore po bazohen në Nenin 57 të Rregullores Disiplinore të Futbollit, ndërsa në listë gjenden emra të njohur nga klubet kryesore të Süper Ligës.

Në mesin e të hetuarve janë raportuar lojtarë si Ersin Destanoğlu dhe Necip Uysal nga Beşiktaş, Metehan Baltacı dhe Eren Elmalı nga Galatasaray, si edhe Boran Başkan dhe Salih Malkoçoğlu të Trabzonspor.

Komiteti i Çështjeve Ligjore të Federatës ka konfirmuar se do të merren masa disiplinore të menjëhershme, ndërsa hetimet pritet të thellohen në bashkëpunim me autoritetet shtetërore. Për shkak të përmasave të jashtëzakonshme të çështjes, TFF ka kërkuar ndihmën e FIFA-s, duke kërkuar një “dritare të jashtëzakonshme transferimesh” 15-ditore, që do t’u mundësojë klubeve të zëvendësojnë lojtarët e përfshirë në skandal.

Ndërkohë, ndeshjet e Divizionit të Dytë dhe të Tretë janë shtyrë për dy javë, ndërsa Süper Lig dhe Divizioni i Parë do të vazhdojnë sipas kalendarit normal.

TFF ka shtuar se rastet që përfshijnë 47 lojtarë që kanë vendosur vetëm një bast do të rishikohen veçmas, ndërsa ekziston mundësia që hetimi të zgjerohet edhe më tej. Skandali i fundit ka tronditur opinionin publik turk dhe ka vënë në alarm institucionet ndërkombëtare të futbollit.