Zgjedhjet e pjesshme lokale/ Ka nisur pa probleme procesi i votimit në Bashkinë e Cërrikut

Mëngjesin e sotëm ka nisur procesi i votimit në Bashkinë e Cërrikut, ku qytetarët po ushtrojnë të drejtën e tyre për të zgjedhur kryetarin e ri të bashkisë. Deri më tani, procesi po zhvillohet normalisht, pa problematika dhe pa ndërprerje.

Në territorin e Bashkisë së Cërrikut janë gjithsej 57 qendra votimi, ndërsa numri total i zgjedhësve të regjistruar në listë është 38,740.

Zgjedhjet e 9 nëntorit po zhvillohen në të gjitha njësitë administrative që përbëjnë bashkinë:

• Cërrik (qyteti qendër) – 17 qendra votimi

• Gostimë – 16 qendra votimi

• Klos – 7 qendra votimi

• Mollas – 10 qendra votimi

• Shalës – 7 qendra votimi

Në garë për drejtimin e bashkisë janë tre kandidatë:

• Florenc Doko, përfaqësues i Partisë Socialiste, jurist në profesion;

• Amarildo Hoxha, i mbështetur nga Partia Demokratike, mjek dhe aktiv në fushën e shëndetësisë dhe çështjeve sociale;

• Eligert Hima, kandidat i nismës “Shqipëria Bëhet”, i diplomuar për Kriminologji në Milano, që përfaqëson një brez të ri politikanësh me vizion qytetar dhe integrues.
Bashkia e Cërrikut zhvillon këto zgjedhje të pjesshme pas emërimit të ish-kryebashkiakut Andis Salla në postin e Ministrit të Bujqësisë.