FOX News: Alex Soros del në mbështetje të Mamdanit në kohën kur Trump ka nisur një fushatë kundër tyre

Nga Emma Colton, FOX NEWS

Miliarderi i krahut të majtë, Alex Soros, djali i filantropit miliarder George Soros, i tha gazetës ‘New York Times’ se kishte votuar për kandidatin socialist për kryebashkiak të Nju Jorkut, Zohran Mamdani.

"Isha krenar që mbështeta dhe votova për kandidatin demokrat për kryebashkiak," tha Soros për ‘New York Times’ në një deklaratë të dërguar me email në ditën e zgjedhjeve.

Alex Soros është djali i themeluesit të Fondacioneve të Shoqërisë së Hapur, George Soros, i cili ka ndihmuar në financimin e fushatave të krahut të majtë që nga prokurorët e distrikteve deri te zgjedhjet federale. Alex Soros e pasoi të atin si kryetar i bordit drejtues të organizatës gjigante jofitimprurëse prej 25 miliardë dollarësh në vitin 2022.

Mbështetja e Alex Soros për Mamdani-n nuk është surprizë, pasi Fondacionet e Shoqërisë së Hapur (Open Society Foundations) raportohet se kanë dhuruar 37 milionë dollarë gjatë dekadës së fundit për grupe të krahut të majtë që në fund mbështetën nominimin e Mamdani-t këtë vit, siç është Partia e Familjeve Punëtore (Working Families Party), raportoi ‘New York Post’ në korrik.

Soros i ri është me origjinë nga Nju Jorku.

Mbështetja e Alex Soros për Mamdani-n vjen ndërkohë që presidenti Donald Trump e ka sulmuar kandidatin për kryebashkiak duke e quajtur “komunist,” si dhe ka vazhduar fushatën e tij kundër familjes Soros për donacionet e tyre ndaj kauzave dhe kandidatëve të krahut të majtë, përfshirë edhe thirrjet për hetime ndaj George dhe Alex Soros.

“Soros dhe grupi i tij i psikopatëve i kanë shkaktuar dëme të mëdha vendit tonë! Kjo përfshin edhe miqtë e tij të çmendur nga Bregu Perëndimor. Kini kujdes, ne po ju vëzhgojmë!”, shkroi Trump në platformën Truth Social në gusht.

Fox News Digital kontaktoi me Fondacionet e Shoqërisë së Hapur të martën në mbrëmje për një koment shtesë në lidhje me mbështetjen e Soros për Mamdani-n, por nuk mori menjëherë një përgjigje.