Çmimet marramendëse të biletave të skive po i bëjnë pistat e Evropës të papërballueshme për shumë pushues

Çmimet për të shijuar një ditë në pistat e skive janë bërë më të larta se kurrë. Një raport i fundit zbulon se që nga viti 2015, kostoja e skijimit në Evropë është rritur me 34.8 për qind mbi inflacionin, me vendpushimet zvicerane, austriake dhe italiane që mbajnë pjesën më të madhe të përgjegjësisë për këtë rritje.

Në Itali, rritja e çmimeve për sezonin e ri ka shkaktuar polemika të ashpra. Organizata e mbrojtjes së konsumatorëve Assoutenti e ka cilësuar këtë rritje si “krejtësisht të pajustifikuar dhe të papranueshme”.
Sipas raportit të tyre, biletat ditore për shpatet nga Dolomitet në Apenine pritet të jenë deri në 40 për qind më të shtrenjta se në vitin 2021.

Këtë sezon, bileta Dolomiti Superski – e vlefshme për 12 vendpushime të njohura në Dolomite – do të kushtojë 86 euro në ditë, ndërsa në Roccaraso, në Apeninet e Abrucos, çmimi do të arrijë në 60 euro.
Biletat sezonale variojnë nga 755 euro në Roccaraso deri në 1,800 euro në Luginën e Aostës.

Përveç çmimeve të biletave, janë rritur edhe kostot e pajisjeve me qira, akomodimit dhe ushqimit në vendpushimet malore. Operatorët e industrisë i justifikojnë këto rritje me faturat e larta të energjisë dhe shpenzimet e mirëmbajtjes, megjithëse Assoutenti thekson se çmimet e energjisë tashmë janë stabilizuar, duke e bërë rritjen aktuale “të pajustifikuar”.

“Skijimi po shndërrohet në një luks vetëm për të pasurit,” – paralajmëroi Gabriele Melluso, president i Assoutenti.

Çmimet pothuajse janë dyfishuar që nga viti 2005

Një analizë nga Radical Storage vitin e kaluar zbuloi se bileta mesatare ditore për vendpushimet evropiane të skive kushtonte 66.46 euro në vitin 2023, një rritje prej 24.7% krahasuar me periudhën para pandemisë (2019).
Nëse krahasohet me vitin 2005, çmimet janë rritur me 92.6%, që do të thotë se skiatorët sot paguajnë pothuajse dyfish për të njëjtën pjerrësi.

Ndër vendet me rritjen më të madhe që nga viti 2015, Bullgaria kryeson me 34.8%, e ndjekur nga Austria (34.3%) dhe Italia (33.1%).
Në Itali, resorti Paganella është bërë 51.1% më i shtrenjtë që prej vitit 2019.

Në anën tjetër, Zermatt në Zvicër u rendit resorti më i shtrenjtë në Evropë vitin e kaluar, me një biletë ditore prej 108 eurosh.
Kundrejt tij, Kopaonik në Serbi mbetet më i liri, me vetëm 37 euro në ditë.
Në Alpet franceze, Espace Diamant, pranë qytetit Annecy dhe vetëm 90 minuta nga Gjeneva, ofron një alternativë më të përballueshme me 47.50 euro për biletë ditore, më pak se gjysma e çmimit të resorteve zvicerane përtej kufirit. / Euronews - Syri.Net