Shoqëria Civile kundër Ministrisë: Mjaft me Heshtje dhe Reels në Instagram

Zëri i shoqërisë civile u bë protagonist në protestën e naftëtarëve që po zhvillohet pranë Ministrisë së Ekonomisë.  Një përfaqësues thekson se heshtja e ministrisë përbën një "shkelje të dytë" të të drejtave të punëtorëve, duke shtuar se është e patolerueshme që qeveria nuk ndërhyn për të ndërmjetësuar me kompaninë "Bankers". Ai kujton se nafta është pasuri kombëtare dhe ata që e nxjerrin meritojnë dinjitet, duke akuzuar ministrinë se "nuk do t'ia dijë" për ta.

Pas tij, një protestuese i drejtohet personalisht ministres së Ekonomisë. Duke ironizuar deklaratat e saj për një "ekonomi që flet" dhe rritje pagash, ai e përball me realitetin e hidhur të 110 naftëtarëve në ditën e 15-të të grevës së urisë.

LEXO EDHE: Naftëtarët e 'Bankers Petroleum' në ditën e 15-të të protestës: Nëse nuk ka zgjidhje, grevë urie para Kryeministrisë

Apeli i tij është i prerë: "Përpos leksioneve me reels në Instagram, ju lutem, dilni zyrtarisht dhe bëni ndërmjetësimin mes punëtorëve dhe kompanisë".

Segmenti mbyllet me thirrjet ritmike të turmës: "Reago!" dhe "Mjaft heshtje!".

Deklarata e plotë:

"Përfaqësues i Shoqërisë Civile, por mbi të gjitha si qytetarë, jemi sot këtu për t’u solidarizuar me kauzën e drejtë të naftëtarëve dhe për t’i bërë me dije Ministrisë së Ekonomisë se heshtja e tyre e gjatë duhet të marrë fund, sepse është një shkelje e dytë e të drejtave të punëtorëve të naftës.

Kjo heshtje, përtej shpërfilljes institucionale, është një mesazh i padrejtë për të gjithë punëtorët shqiptarë që kërkojnë vetëm të drejtën për një jetesë të ndershme.

Heshtja e tyre ka krijuar vështirësi të mëdha në shëndetin e naftëtarëve që prej 14 ditësh janë në grevë urie. Është e patolerueshme që qeveria dhe ministria përgjegjëse të mos ndërhyjnë pas kësaj heshtjeje kaq të gjatë për të ndërmjetësuar dhe për t’u dhënë një zgjidhje të drejtë punëtorëve të naftës.

LEXO EDHE: Protestë para Ministrisë së Ekonomisë/ Naftëtarët në grevë urie, kërkohet ndërhyrja urgjente e qeverisë

Nafta është një pasuri kombëtare dhe ata që punojnë për të duhet të trajtohen me dinjitet. Por Ministria e Ekonomisë nuk po tregon kujdes për këta punëtorë, të cilët prej vitesh punojnë dhe sakrifikojnë gjithçka, shpesh në kushte të vështira dhe pa siguri për të nesërmen.

Kërkojmë që ministria të ndërgjegjësohet dhe të vërë drejtësi në vend, sepse shkelja e të drejtave të punëtorëve dëmton shtetin dhe kauzën tonë për integrim në Bashkimin Europian.

Sot jemi këtu për t’u bërë zë i tyre, por nëse heshtja vazhdon, nesër do të jemi edhe më shumë për të mbështetur këtë kauzë të drejtë, sepse pas çdo punëtori janë familjet dhe fëmijët e tyre, që janë përgjegjësi e këtij shteti dhe dëshmi e padrejtësisë që po përjetohet".