Mercedes sheh rënie të fitimeve tremujore për shkak të dobësisë së Kinës dhe tarifave të SHBA-së

Prodhuesi gjerman i makinave Mercedes-Benz njoftoi të mërkurën një rënie prej 31% të fitimit neto në tremujorin e tretë, ndërsa kompania përballet me shitje të dobëta në Kinë dhe tarifa të shtuara mbi eksportet drejt SHBA-së.

Fitimi ra në 1.19 miliardë euro nga 1.71 miliardë euro në të njëjtën periudhë të një viti më parë, ndërsa të ardhurat zbritën me 7%, në 32.15 miliardë euro. EBIT-i i rregulluar u ul me 17%, në rreth 2.1 miliardë euro.

Megjithatë, Mercedes-Benz ruajti parashikimin e saj vjetor, duke e konsideruar rënien pjesë të zhvillimeve të pritshme në treg.

“Rezultatet tona të tremujorit të tretë janë në përputhje me udhëzimet tona për të gjithë vitin,” tha drejtori ekzekutiv Ola Källenius.
“Programi ynë më i madh i lançimit të produkteve dhe teknologjisë është në rrugën e duhur… Ne mbetemi të përqendruar në përmirësimin e përvojës së klientit dhe rritjen e efikasitetit në të gjithë kompaninë.”

Kompania me seli në Stuttgart konfirmoi gjithashtu se do të vazhdojë me blerjen e aksioneve me vlerë 2 miliardë euro, e miratuar më herët gjatë vitit.

Ashtu si konkurrentët e tjerë evropianë, Mercedes po përballet me presione nga tarifat e larta në SHBA dhe me një rënje të kërkesës në tregun kinez, ku shitjet u tkurrën me 27%.

Konkurrenca nga prodhuesit vendas si BYD dhe Xiaomi po e vështirëson më tej pozicionin e kompanisë gjermane, e cila përpiqet të mbajë ritmin në një treg gjithnjë e më të ndjeshëm ndaj çmimeve.