Sërish paralajmërim për përdoruesit e Gmail, 183 milionë fjalëkalime të vjedhura, si të kontrolloni nëse jeni në rrezik

Një paralajmërim i ri nga një ekspert i sigurisë kibernetike ka ngritur shqetësim për përdoruesit e Gmail, pas zbulimit të një rrjedhjeje gjigante të dhënash që mund të përmbajë fjalëkalimet e vjedhura të miliona njerëzve.

Eksperti australian Troy Hunt, i njohur për faqen “Have I Been Pwned”, zbuloi se bëhet fjalë për një koleksion të madh të dhënash me peshë rreth 3.5 terabajt, që përfshin rreth 183 milionë adresa unike email-i nga të gjithë ofruesit kryesorë të shërbimeve, përfshirë Gmail, Outlook dhe Yahoo.

Sipas Hunt, kjo nuk është një shkelje e vetme sigurie, por një koleksion i të dhënave të mbledhura nga programe keqdashëse, të njohura si “log-e vjedhësish”, të cilat vazhdojnë të përhapin të dhëna personale nëpër platforma të ndryshme në internet. “Sapo aktorët keqdashës marrin në dorë të dhënat tuaja, ato shpesh shumëfishohen dhe shpërndahen në mënyrë të pakontrolluar”, theksoi ai.

Eksperti këshillon që përdoruesit të kontrollojnë nëse janë prekur duke vizituar faqen Have I Been Pwned, ku mund të verifikojnë nëse adresa e tyre e email-it është pjesë e ndonjë shkeljeje sigurie në dhjetë vitet e fundit. Nëse rezulton e prekur, rekomandohet ndryshimi i menjëhershëm i fjalëkalimit dhe aktivizimi i vërtetimit me dy faktorë.

Ndërkohë, një zëdhënës i Google ka sqaruar për The Sun se nuk bëhet fjalë për një sulm të ri ndaj Gmail, por për “aktivitet të njohur të softuerëve që vjedhin të dhëna nga llogari të ndryshme online”. Ai shtoi se Google përdor masa shumështresore sigurie dhe se përdoruesve u kërkohet të forcojnë mbrojtjen përmes autentifikimit me dy faktorë ose çelësave të aksesit.

Ekspertët theksojnë se, edhe pse Gmail nuk është shënjestra e drejtpërdrejtë e këtij incidenti, çdo përdorues duhet të kontrollojë periodikisht nëse llogaritë e tij janë komprometuar, përfshirë edhe ato të vjetra që nuk përdoren më.