Topalli ‘shpërthen’ në Kuvend: Urdhër politik për të na mbyllur gojën, autoritarizmi fillon pikërisht këtu

Seanca parlamentare është shoqëruar me debate të ashpra, ku deputetja e PD-së, Jozefina Topalli ka lëshuar akuza të rënda ndaj drejtuesve të Kuvendit, duke pretenduar se po zbatohet një "urdhër politik për t'i mbyllur gojën opozitës".

Gjatë fjalës së saj, Topalli kritikoi ashpër referimin ndaj një manuali në vend të rregullores së Kuvendit për menaxhimin e procedurave.

Sipas saj, ky veprim është i paprecedentë dhe i rrezikshëm. "Mua më bën shumë përshtypje që ju flisni për manual dhe ju duket se manuali qëndron mbi rregulloren. Është njëlloj si të thuash se ligji qëndron mbi Kushtetutën," deklaroi ajo, duke theksuar se një logjikë e tillë është e paimagjinueshme në një shtet ligjor.

Deputetja argumentoi se mohimi i së drejtës për të bërë pyetje është një shkelje e hapur e të drejtave kushtetuese të deputetëve dhe një praktikë që nuk ka ndodhur kurrë në historinë e parlamentarizmit shqiptar. Ajo e cilësoi vendimin si një "urdhër politik" që synon të heshtë zërin e opozitës dhe kritikoi justifikimin se kjo bëhet "për të mbrojtur shtetin".

Për të përforcuar argumentin e saj, Topalli citoi filozofen e njohur Hannah Arendt, duke paralajmëruar për rrezikun e autoritarizmit.

"Pikërisht autoritarizmi fillon në këtë pikë, kur pushteti flet për shtetin dhe shteti hesht nga frika," tha ajo, duke tërhequr një paralele mes veprimeve aktuale në Kuvend dhe fillimeve të regjimeve autoritare.

Në përfundim, Topalli solli një shembull personal duke kujtuar se ka votuar kundër propozimeve të maxhorancës së saj në të kaluarën, kur ka besuar se ato binin ndesh me parimet dhe ligjin, duke nënvizuar se besnikëria ndaj rregullave duhet të mbizotërojë mbi vendimet politike të shumicës.

Topalli: Detyra e kryetarit të Kuvendit nuk është e thjeshtë. Jo sot. Shumë herë ke për t'u gjetur përballë situatave të vështira, nëse ju nuk vendosni që do i qëndroni vetëm rregullores. Mua më bën shumë përshtypje që ju flisni për manual dhe ju duket se manuali qëndron mbi rregulloren. Është njëlloj si të thosh ligji qëndron mbi Kushtetutën, apo kodet qëndrojnë mbi Kushtetutën, apo ligjet qëndrojnë mbi kodet. Është e paimagjinueshme që mund ta thoni një gjë të tillë. Ka një historik parlamentarizmi dhe nuk ka ndodh kurrë që kur deputeti i opozitës apo i maxhorancës, ka dashur që të bëjnë pyetje, atij t'i mohohet e drejta e pyetjes. Dhe kjo është një e drejtë e tyre e fituar me Kushtetutë, me rregullore dhe me gjithë historikun që ne e kemi brenda këtij parlamenti me plus dhe minuse që ka. Ndaj dhe, urdhri politik që ju keni marrë, që ju keni marrë, është për t'i mbyllur gojën opozitës. Kjo është një gjë shumë e rëndë. Ju thatë edhe një frazë: Këtë e bëjmë pasi hoqët dorë nga rregullorja dhe manuali, ju thatë që ne këtë e bëjmë për të mbrojtur shtetin. Po të ishte Ana, Hana Arendt, është një ndër filozofet më të veçanta të historisë së njerëzimit, ajo do thoshte se pikërisht autoritarizmi fillon në këtë pikë. Kur pushteti flet për shtetin dhe shteti hesht nga frika. Tashti do them një gjë nga eksperienca ime. Nuk ka ndodh kurrë që kur organe të bazuara nga ligji apo nga Kushtetutë, kanë ardhur për të raportuar këtu dhe deputetët kanë dashur për të bërë pyetje, kurrë nuk i është mohuar e drejta e pyetjes. Dhe e fundit, njeriu vendos që edhe të ikë nga një karrigë, nëse ligji që detyron për të zbatuar bie në kundërshtim me vendimin politik të maxhorancës.