‘Reform’ përkthen sondazhet në vota reale, Laburistët mbeten shumë më pas

Një analizë e zgjedhjeve lokale tregon se epërsia e madhe e Reform UK në sondazhe po shndërrohet në vota të vërteta, ndërsa mbështetja për laburistët po vlerësohet më shumë sesa në realitet.

Në 108 zgjedhjet e pjesshme për këshillat lokalë të mbajtura që nga maji, Reform ka marrë 30 për qind të votave, ndërsa si laburistët ashtu edhe konservatorët kanë siguruar nga 17 për qind secili. 

Kjo do të thotë se sondazhet e fundit që e vendosin Reform në 30% ose më shumë përfaqësojnë saktësisht nivelin real të mbështetjes për partinë e Nigel Farage, ndërsa sondazhet që i japin laburistëve një mesatare prej rreth 21% po e mbivlerësojnë mbështetjen për partinë në pushtet.

Një sondazh i madh për çdo zonë elektorale, mbi qëllimin e votimit në Westminster, më parë kishte vlerësuar se, pa votim taktik, Reform do të fitonte një shumicë të madhe në Parlament me 445 vende nëse zgjedhjet e përgjithshme do të mbaheshin tani, me laburistët që do të merrnin 73 vende dhe konservatorët pothuajse do të zhdukeshin me vetëm shtatë.

Si Sir Keir Starmer ashtu edhe Kemi Badenoch, udhëheqësja e konservatorëve, ka të ngjarë të përballen me presion të madh nga partitë e tyre nëse nuk arrijnë të tregojnë rritje të mbështetjes në zgjedhjet lokale të majit 2026, kur dhjetëra këshilla dhe bashki, përfshirë të 32 bashkitë e Londrës, do të jenë në garë.

Në total, 210 mijë vota janë hedhur në 108 zgjedhjet e pjesshme lokale të mbajtura që nga raundi i fundit i zgjedhjeve lokale më 8 maj të këtij viti.

Kompania e sondazheve Electoral Calculus mblodhi votat për secilën parti dhe zbuloi se Reform mori 30% të totalit, liberaldemokratët ishin të dytët me 18%, ndërsa laburistët dhe konservatorët morën nga 17% secili, dhe Partia e Gjelbër 9%.

Lajmet janë edhe më të këqija për laburistët kur këto shifra përkthehen në një vlerësim për zgjedhjet e përgjithshme, duke marrë parasysh faktin që zonat ku janë mbajtur zgjedhje të pjesshme mund të jenë të anshme në favor të një partie të caktuar.

Përqindja kombëtare ekuivalente e votës pë laburistët llogaritet në 16%, pesë pikë më poshtë se mesatarja e partisë në sondazhet e fundit, dhe gjatë katër muajve të fundit ajo shifër ka rënë edhe më shumë, në 15%.

Duke përdorur të njëjtën metodë llogaritjeje, pjesa e votës për Reform bie në 29%, ndërsa konservatorët janë në 18%, përafërsisht sa sugjerojnë sondazhet, dhe liberaldemokratët në 18%, katër pikë përqindje më shumë se në sondazhet e fundit.

Nëse këto rezultate do të përsëriteshin në një zgjedhje të përgjithshme, Reform do të parashikohej të fitonte 316 vende, vetëm dhjetë më pak se shumica absolute.

Sipas të njëjtit parashikim, konservatorët do të merrnin 63 vende, që do t'u mundësonte të formonin një koalicion me Reform, ndërsa Laburistët do të kishin 107 vende, liberaldemokratët 84, SNP 41 dhe Partia e Gjelbër nëntë.

Martin Baxter, i cili kreu kërkimin për Electoral Calculus në emër të Reform UK, tha: "Duke parë votat reale të hedhura nga 210 mijë persona, të dhënat tregojnë se liberaldemokratët janë më të suksesshëm në performancën lokale krahasuar me sondazhet kombëtare.

"Më e rëndësishmja, Reform UK rezulton po aq mirë në nivel lokal sa edhe në sondazhet kombëtare, ndërsa Laburistët më keq. Kjo vazhdon të sugjerojë se avantazhi aktual i Reform në sondazhet kombëtare ka një farë kredibiliteti."

Shifrat përputhen gjerësisht me rezultatet e zgjedhjeve lokale në maj, kur pjesa e votës për Reform ishte 30%, për liberaldemokratët 17% dhe për konservatorët 15%. Ndryshimi i madh është se laburistët morën 20% të votave në maj 2025, një pjesë votash që ka rënë ndjeshëm që atëherë.

Më herët gjatë javës, një sondazh për çdo zonë zgjedhore, me 7449 të rritur të anketuar nga firma e komunikimit PLMR me Electoral Calculus, sugjeroi se Reform do të fitonte 445 vende nëse zgjedhjet do të mbaheshin tani, me laburistët në 73, liberaldemokratët në 42, SNP në 41, partinë Your Party të Jeremy Corbyn me 13 dhe konservatorët me shtatë.

Ky sondazh shoqërohej me shënimin se nuk mund të merrte parasysh votimin taktik, i cili mund t'ia mohonte Nigel Farageçelësat e Downing Street nëse votuesit konservatorë, liberalë dhe laburistë do të ndiqnin taktikën "këdo përveç Reform", duke kaluar votën tek partia që ka më shumë gjasa të mposhtë partinë e djathtë në secilën zonë.

Nigel Farage i tha The Telegraph: "Kjo analizë e detajuar vërteton se vota për Reform në vend është reale dhe nuk po zhduket.

"Kjo qeveri laburiste, e cila është tepër e papëlqyer, nuk po arrin të mbajë as nivelin e ulët të mbështetjes që tregojnë sondazhet për të." / The Telegraph - Syri.net