Shkon në 13 numri i të plagosurve nga shpërthimi në një pallat apartamentesh në Rumani

Një shpërthim i fuqishëm tronditi kryeqytetin e Rumanisë të premten, duke shkatërruar dy kate të një ndërtese apartamentesh tetëkatëshe dhe duke shkaktuar të paktën tre viktima dhe 13 të plagosur, sipas autoriteteve vendase.

Sipas Inspektoratit të Situatave të Emergjencave të Bukureshtit, shpërthimi preku katet e pestë dhe të gjashtë të ndërtesës në Calea Rahovei, në sektorin 5 të qytetit.

“Të paktën 500 persona nuk do të mund të kthehen më në banesat e tyre. Bashkia, prefektura dhe të gjitha strukturat përkatëse janë mobilizuar për të siguruar strehim dhe ndihmë emergjente,” deklaroi kryebashkiaku i përkohshëm i Bukureshtit, Stelian Bujduveanu.

Në vendngjarje u dërguan më shumë se një duzinë automjetesh emergjente, përfshirë 11 zjarrfikëse dhe katër njësi të kujdesit intensiv.

Shkaku i shpërthimit ende nuk është bërë i ditur, por furnizimi me gaz në zonë u ndërpre si masë sigurie.

Sipas Ministrisë së Shëndetësisë, viktimat janë raportuar me politraumë dhe djegie të rënda. Një person u gjet i pajetë nën rrënojat e një pllake betoni në katin e gjashtë, ndërsa 13 të plagosur u transportuan në spitalet e kryeqytetit.

Të gjithë banorët u evakuuan dhe ekipet e shpëtimit po vijojnë kërkimet për persona të mundshëm të bllokuar. Nxënësit dhe mësuesit e një shkolle aty pranë u evakuuan gjithashtu si masë paraprake.

Pamjet e shpërndara nga autoritetet tregojnë fasadat e shkatërruara të ndërtesës dhe rrënoja të shpërndara në rrugë, ndërsa dritaret e ndërtesave fqinje janë thyer nga fuqia e shpërthimit.

Kryeministri Ilie Bolojan deklaroi se ndërtesa e dëmtuar do të duhet të shembet.
“Sipas vlerësimeve fillestare të Inspektoratit Shtetëror të Ndërtimit, blloku nuk mund të rindërtohet dhe do të duhet të shembet,” tha ai.