Ofcom: Dokumentari i BBC-së për Gazën është një 'shkelje serioze' e rregullave

Ian Youngs – BBC/

BBC ka kryer një "shkelje serioze" të rregullave të transmetimit duke mos zbuluar se rrëfimtari i një dokumentari për Gazën ishte djali i një zyrtari të Hamasit, sipas rregullatorit britanik të medias, Ofcom.

Një hetim i Ofcom-it për dokumentarin Gaza: How to Survive a Warzone ka dalë në përfundimin se programi i ka gënjyer shikuesit.

"Hetimi ynë zbuloi se mostregimi nga drejtuesit e programit se babai i rrëfimtarit mbante një post në administratën e drejtuar nga Hamasi ishte tejet shtrembëruese," tha institucioni mbikëqyrës.

"Kjo bëri që audienca të mos kishte informacion thelbësor, i cili mund të kishte qenë shumë i rëndësishëm për vlerësimin e rrëfimtarit dhe të informacionit që ai dha."

Drejtori i përgjithshëm i BBC-së më parë kishte kërkuar falje, duke thënë se kishte pasur "një dështim të madh në lidhje me korrektësinë".

Ofcom ka urdhëruar BBC-në të transmetojë një deklaratë në orët e pikut lidhur me konkluzionet e tij.

"Meqë kjo përfaqëson një shkelje serioze të rregullave tona, ne udhëzojmë BBC-në të transmetojë një deklaratë me gjetjet tona kundër saj në BBC2, në orën 21:00, në një datë që mbetet për t'u konfirmuar," tha Ofcom.

Dokumentari u hoq nga platforma iPlayer në shkurt, pasi dolën lidhjet familjare të djalit, dhe në korrik një rishikim i brendshëm i BBC-së zbuloi se ai kishte shkelur udhëzimet redaksionale për korrektësinë.

Një zëdhënës i BBC-së tha: "Vendimi i Ofcom-it është në përputhje me zbulimet e Peter Johnston-it, i cili doli në përfundimin se kishte një dështim të rëndësishëm në dokumentar në lidhje me Udhëzimet Redaksionale të BBC-së për korrektësinë, që reflektojnë Rregullin 2.2 të Kodit të Transmetimit të Ofcom-it.

"Ne kemi kërkuar falje për këtë dhe e pranojmë plotësisht vendimin e Ofcom-it. Ne do të zbatojmë sanksionin sapo të përcaktohen data dhe formulimi përfundimtar." /BBC - Syri.net