SKANDAL/ Klinika dentare në ‘Don Bosko’ nën hetim për evazion fiskal dhe produkte të skaduara, arrestohet administratori turk
Klinika dentare në zonën e “Don Boskos” në Tiranë, 'Dental Turk', është zbuluar se operonte në kundërshtim me ligjin, duke përdorur produkte të skaduara dhe duke shmangur detyrimet tatimore. Seksioni për Hetimin e Pastrimit të Parave dhe Aseteve Kriminale finalizoi operacionin policor të koduar “Dentistry”, gjatë të cilit u arrestua administratori i klinikës, shtetasi turk Ahmet YILDIZOĞLU, ndërsa u vunë nën hetim edhe tre punonjës të tjerë.
Gjatë kontrollit, Policia gjeti dhe sekuestroi rreth 300 shishe me produkte dentare, shumica të skaduara dhe pa fatura zhdoganimi, me vlerë rreth 100 mijë euro, si dhe një sasi mandatesh të pafiskalizuara. Hetimet vijojnë për të përcaktuar dëmin ekonomik dhe penalitetet që rrjedhin nga kjo veprimtari e paligjshme.
Njoftimi i policisë:
Tiranë/Seksioni për Hetimin e Pastrimit të Parave dhe Aseteve Kriminale finalizon operacionin policor të koduar “Dentistry”.
Zbulohet se në një klinikë dentare në “Don Bosko”, kryhej evazion fiskal dhe shërbehej me produkte të skaduara.
Sekuestrohen 300 shishe me produkte (shumica, të skaduara), pa fatura zhdoganimi, me vlerë rreth 100 000 euro, si dhe mandate të pafiskalizuara.
Arrestohet administratori i klinikës (shtetas turk).
Vihen në hetim koordinatorja e subjektit dhe 2 laborantë.
Si rezultat i administrimit të shpejtë të informacioneve të siguruara në rrugë operative, se në një subjekt (klinikë stomatologjike) në zonën “Don Bosko”, kryheshin krime ekonomike dhe krime kundër shëndetit/jetës, specialistët e Seksionit për Hetimin e Pastrimit të Parave dhe Aseteve Kriminale finalizuan operacionin “Dentistry”.
Gjatë ndërhyrjes në ambientet e klinikës, u kap dhe u arrestua administratori i subjektit, shtetasi turk, A. Y., 59 vjeç.
Gjithashtu, u kapën në flagrancë, 3 punonjës të klinikës, konkretisht koordinatorja, shtetasja B. K., 35 vjeçe, si dhe 2 laborantët, shtetasit L. S., 21 vjeçe dhe A. A., 42 vjeç, për të cilët nisi procedimi në gjendje të lirë.
Nga kontrolli në ambientet e klinikës u gjetën dhe u sekuestruan me cilësinë e provës materiale, 300 shishe me produkte (shumica, të skaduara), me vlerë rreth 100 000 euro, për të cilat nuk disponoheshin fatura zhdoganimi, si dhe mandate të pafiskalizuara. Vijojnë hetimet për të përcaktuar dëmin ekonomik që i është caktuar shtetit, si pasojë e shmangies së detyrimeve tatimore nga ky subjekt.
Materialet procedurale iu referuan Prokurorisë së Tiranës, për veprime të mëtejshme.