Raphinha u nënshtrohet kontrolleve mjekësore, shenja pozitive për rikthimin nga dëmtimi

Sipas raportimeve të ‘El Mundo Deportivos’, Raphinha iu nënshtrua të enjten një rezonance magnetike (MRI) për të vlerësuar shkallën e dëmtimit të tij dhe për të përcaktuar afatet e sakta të rikuperimit.

Sulmuesi brazilian i Barcelonës ka qenë jashtë fushave për tri javë, që prej dëmtimit të pësuar në ndeshjen kundër Real Oviedo muajin e kaluar. Fillimisht, stafi mjekësor i klubit katalanas kishte parashikuar që ai do të mungonte rreth tri javë, por tani duket se rikuperimi ka zgjatur më shumë se sa pritej dhe braziliani mund të qëndrojë jashtë edhe të paktën një javë shtesë.

Megjithatë, lajmet janë inkurajuese: ekziston mundësia që Raphinha të jetë gati për ndeshjen e Ligës së Kampionëve kundër Olympiacos-it, në mesjavë, dhe të jetë plotësisht i rikuperuar për “El Clásicon” ndaj Real Madridit.

Pavarësisht rëndësisë së këtyre takimeve, drejtuesit dhe stafi mjekësor i Barcelonës nuk duan të rrezikojnë, duke vendosur prioritet rikuperimin afatgjatë të lojtarit përpara rikthimit të menjëhershëm në fushë.