Skandali McGonigal vazhdon të trondisë Amerikën/ Sot pritet dënimi i ish-diplomatit rus që gënjeu FBI-në
Ngushtohet laku rreth kryeministrit Edi Rama teksa pritet dënimi i ish-diplomatit rus Sergei Shestakov, një prej personazheve kyç në skandalin që përfshiu ish-agjentin e FBI-së, Charles McGonigal. Rasti, që lidhet me oligarkun rus Oleg Deripaska, ka hedhur dritë mbi rrjetin e ndikimeve ruse në SHBA dhe përfshirjen e mundshme të emrave të lartë politikë jashtë vendit, përfshirë edhe Tiranën zyrtare.
Nga Mike Eckel, Radio Free Europe
Një ish-diplomat rus, i lidhur me një skandal për shmangie sanksionesh, që përfshinte një nga ish-agjentët kryesorë të kundërzbulimit të FBI-së dhe një oligark të njohur rus, pritet të dënohet për akuzën se ka gënjyer autoritetet amerikane.
Dënimi i Sergei Shestakov, i planifikuar për datën 16 tetor në gjykatën federale të Manhatanit, mbyll një kapitull të një çështjeje që jo vetëm e turpëroi FBI-në, por edhe hodhi një dritë të re mbi Oleg Deripaskën, një miliarder i lidhur me Kremlinin, që ka qenë prej kohësh në shënjestër të FBI-së.
Në dosjet përfundimtare të gjykatës, prokurorët amerikanë argumentuan se Shestakov, 71 vjeç, i cili punonte si përkthyes i autorizuar federal pas marrjes së shtetësisë amerikane në vitin 2013, e dinte se ishte krim të gënjeje agjentët e FBI-së që po hetonin ish-agjentin e FBI-së, Charles McGonigal.
Në kohën e daljes në pension në vitin 2018, McGonigal ishte një nga agjentët kryesorë në zyrën e FBI-së në Nju Jork, përgjegjës për hetimet e spiunëve dhe oligarkëve rusë, ndër të tjera.
Prokurorët kërkuan një dënim të butë – gjashtë muaj burg dhe një gjobë prej 5.000 dollarësh.
Ndërkohë, avokatja mbrojtëse e Shestakovit, Rita Glavin, kërkoi që ai të dënohej me “kohën e shërbyer”, pra vetëm periudhën e shkurtër që ai kaloi në paraburgim federal në vitin 2023, para se të lirohej me kusht.
“Ndjenja e tij e frikës, mosbesimit ndaj agjentëve dhe ndjenja e gabuar e besnikërisë ia errësuan gjykimin dhe e penguan të ishte plotësisht i sinqertë,” shkroi Glavin.
“Ai do të mbetet përgjithmonë i lidhur me një agjent të korruptuar të FBI-së, Charles McGonigal, dhe do të jetojë nën hijen e dyshimit se ishte spiun rus (nuk ishte) apo tradhtar”.
Glavin nuk iu përgjigj kërkesave për koment shtesë.
Një e-mail dërguar zyrës së prokurorëve federalë të Manhatanit mori përgjigje automatike se operacionet e marrëdhënieve me publikun ishin pezulluar për shkak të mbylljes së përkohshme të qeverisë amerikane.
Në qendër të çështjes janë bisedat e Shestakov me Yevgeny Fokin, një ish-diplomat rus që ai e quante mik të vjetër.
Fokin, një drejtues i lartë në kompaninë kryesore të Deripaskës, En+, u vu nën mbikëqyrje nga FBI që nga korriku 2019 dhe pajisjet e tij elektronike u sekuestruan në gusht 2021 kur hyri në SHBA.
Viza e tij amerikane u revokua një vit më vonë me kërkesë të FBI-së, e cila pretendonte se ai ishte i lidhur me Shërbimin e Inteligjencës së Jashtme të Rusisë (SVR).
Në dokumentet gjyqësore, prokurorët amerikanë kanë pretenduar gjithashtu se Fokin ishte një “bashkëkonspirator i paakuzuar” me Shestakovin dhe McGonigal-in.
Deripaska, të cilit FBI i kishte bllokuar vizën që në vitet 2000, u sanksionua nga Departamenti Amerikan i Thesarit në prill 2018 për lidhjet e tij me Kremlinin; tre vjet më vonë, në 2022, ai u akuzua për përpjekje për t’i mundësuar të dashurës së tij shtatzënë të lindte në SHBA, në mënyrë që fëmija të fitonte shtetësinë amerikane.
Sipas dokumenteve të gjykatës, McGonigal u njoh me Fokin përmes Shestakovit.
Më vonë ai hetoi një oligark tjetër rus, rival i Deripaskës, dhe mori pagesa përmes një kompanie në Qipro.
Në gjyq, avokatët e mbrojtjes pohuan se puna ishte bërë në emër të En+ dhe jo të vetë Deripaskës, duke cituar dëshminë e Fokinit.
McGonigal madje kishte siguruar edhe një praktikë pune për vajzën e Fokinit në Departamentin e Policisë së Nju Jorkut.
Më 21 nëntor 2021, gjatë një takimi me agjentët e FBI-së, Shestakov e minimizoi marrëdhënien e tij dhe të McGonigalit me Fokinin. Agjentët më pas i sekuestruan celularin.
Një javë më vonë, Shestakov u regjistrua si agjent i huaj, duke deklaruar punën e tij për Fokin dhe En+.
Në janar 2023, Shestakov u arrestua në shtëpinë e tij në Connecticut dhe u akuzua për pesë pika, përfshirë gënjeshtra mbi marrëdhënien e tij me Fokin, si ndaj agjentëve të FBI-së, ashtu edhe në formularin e regjistrimit të agjentëve të huaj.
Në qershor 2023, pas heqjes së katër akuzave nga Departamenti i Drejtësisë, ai pranoi fajësinë.
Ndër ata që dërguan letra mbështetëse për Shestakovin ishte edhe Vladimir Gusinsky, një ish-oligark rus që kishte punësuar si atë, ashtu edhe Fokinin për vite me radhë në kompaninë e tij të mediave, Media Most.
Gusinsky, i cili gjithashtu jeton në Connecticut, është pyetur nga FBI për marrëdhëniet e tij me të dy personat dhe me Deripaskën, por nuk është akuzuar për asnjë vepër penale.
McGonigal u dënua me më shumë se tre vjet burg në dhjetor 2023 pasi pranoi fajësinë për pastrim parash dhe shmangie sanksionesh.
Ai u përfshi gjithashtu në një tjetër hetim për marrëdhëniet me biznesmenin shqiptaro-amerikan Agron Nezaj.
Në shkurt 2024, ai u dënua me më shumë se dy vjet burg për marrjen e një ryshfeti prej 225.000 dollarësh.