LETRA/ Komisioni Europian: Po shqyrtojmë zbatimin e ligjit për investimet strategjike në Shqipëri

Anëtari i Këshillit Kombëtar të Partisë Demokratike, Lisandër Hoxha, ka shprehur falënderimin e tij ndaj Komisionit Europian për përgjigjen zyrtare lidhur me zbatimin e Ligjit nr. 55/2015, të njohur si ligji ‘Për investitorin strategjik’. Në një reagim publik, Hoxha e përshkruan këtë ligj si një instrument klientelist që, sipas tij, përdoret nga qeveria për të përvetësuar prona publike dhe private nëpër Shqipëri.

Në reagimin e tij, Hoxha thekson se kishte kontaktuar kabinetin e Komisioneres Marta Kos për të sqaruar procesin e përafrimit të ligjeve shqiptare me ato të Bashkimit Europian dhe ngriti shqetësime rreth ‘efekteve të këtij ligji dhe mungesës së transparencës në zbatimin e tij.’ Siç shprehet vetë Hoxha:

‘Faleminderit, Komisionit Europian, për përgjigjen zyrtare lidhur me aplikimin e Ligjit nr. 55/2015 ‘Për investitorin strategjik’, një ligj i cili është tërësisht klientelist dhe nuk përputhet askund me aktet komunitare të Bashkimit Europian.’

Ai akuzon se ligji ka shërbyer si mjet për përfitim nga një grup i vogël njerëzish pranë qeverisë, duke dëmtuar konkurrencën dhe duke sjellë dhënie pronash publike pa garë:

‘Ky ligj është shndërruar në një mjet për pasurimin e një grupi të vogël njerëzish pranë qeverisë, duke vrarë përfundimisht konkurrencën në vend.’

Hoxha vijon duke theksuar se dhënia e pronave publike pa procedura konkurruese është kundër standardeve të shtetit të së drejtës dhe praktikave në Bashkimin Europian:

 ‘Ky ligj u siguron përfituesve të tij prona publike pa garë, çka është tërësisht e papranueshme për një shtet të së drejtës. Një standard i tillë nuk aplikohet në asnjë vend të Bashkimit Europian. Në vendet demokratike, asetet publike jepen vetëm përmes një procesi transparent dhe me garë publike, ku garantohet interesi i qytetarëve.’

Sipas Hoxhës, përfitimet nga ky ligj kanë qenë të kanalizuara në favor të individëve të lidhur me kryeministrin, të cilët kanë marrë kontrata zhvillimi dhe avantazhe fiskale pa procedura konkurruese:

 ‘Ligji nr. 55/2015 është përdorur për të favorizuar njerëz pranë Kryeministrit Rama, të cilët pa garë dhe me avantazhe të shumta fiskale kanë përfituar kontrata zhvillimi dhe shfrytëzimi të pasurive më të vlefshme të vendit tonë.’

Duke kërkuar ndryshime të menjëhershme, Hoxha shtron që ligji duhet të rishikohet dhe të përafruar me standardet e BE-së për të rivendosur besimin dhe drejtësinë në tregun shqiptar:

‘Ky ligj ka qenë një gangrenë për ekonominë e dobët të vendit tonë. Ai duhet ndryshuar tërësisht dhe përafruar me standardet e Bashkimit Europian, si e vetmja mënyrë për të rikthyer besimin dhe drejtësinë në treg.’

Në përfundim ai sugjeron se mospërputhshmëria e ligjit me aktet komunitare ofron një bazë për Komisionin Europian që t’i kërkojë Shqipërisë ndryshimin e menjëhershëm të tij:

 ‘Mospërputhshmëria e tij me aktet komunitare është një mundësi e mirë që Bashkimi Europian t’i kërkojë Shqipërisë ndryshimin e menjëhershëm të këtij ligji, duke i hequr kështu Ramastanit një mjet për të vjedhur me ligj pasuritë publike.’