Motrat e shqiptarit që u vetëvra në anijen për azilkërkues: Leonardi do të ishte ende gjallë nëse do të ishte trajtuar siç duhet

The Independent

Leonard Farruku, një azilkërkues 27-vjeçar shqiptar, vdiq në bordin e barkës Bibby Stockholm në Portland Port, Dorset, më 12 dhjetor 2023.

Motrat e një të riu shqiptar që i mori jetën vetes në anijen e akomodimit për azilkërkues “Bibby Stockholm” kanë akuzuar autoritetet britanike se dështuan të vlerësojnë dhe trajtojnë gjendjen e tij të rënduar mendore, duke thënë se “ai do të ishte ende gjallë po të kishte marrë ndihmën e duhur”.

Hetimi i zhvilluar nga mjekja ligjore e Dorsetit, Rachael Griffin, zbuloi se Ministria e Brendshme kishte “humbur mundësi të shumta” për të vlerësuar shëndetin mendor të Leonard Farrukut, 27 vjeç, përpara se ai të transferohej në anijen e ankoruar në Portland Port, ku u gjet i pajetë në dhomën e tij më 12 dhjetor 2023.

Motrat e tij, Marsida Keci dhe Jola Dushku, thanë se Leonard kishte vuajtur nga probleme të shëndetit mendor që pas vdekjes së prindërve të tyre dhe se nuk duhej të ishte transferuar në “mjedisin armiqësor” të anijes më 3 nëntor 2023.

Sipas hetimit, Farruku ishte strehuar më parë në hotelin Esplanade në Paignton, Devon, ku kishte shfaqur sjellje agresive që nga korriku 2023. Raportet e stafit të sigurisë dhe shqetësimet për gjendjen e tij mendore iu përcollën Ministrisë së Brendshme, por nuk u futën në sistemin e menaxhimit të rasteve Atlas.

Mjekja ligjore theksoi se sipas politikave të Ministrisë, personat me nevoja komplekse shëndetësore ose mendore nuk duhej të akomodoheshin në Bibby Stockholm, për shkak të vendndodhjes së saj të izoluar dhe aksesit të kufizuar në shërbime.

Në një deklaratë pas hetimit, motrat e Farrukut thanë:

“Ne besojmë fuqimisht se Leonard ishte në një gjendje të rëndë mendore midis korrikut dhe dhjetorit 2023 dhe kishte nevojë për vlerësim dhe trajtim urgjent. Në vend që të ndihmohej, ai u vendos në një mjedis armiqësor dhe krejtësisht të papërshtatshëm. Po të kishte marrë trajtimin e duhur, do të ishte ende gjallë sot.”

Avokatja e familjes, Christina Bodenes, e përshkroi rastin si “një shembull tragjik i dështimeve sistematike të politikës së Ministrisë së Brendshme”, duke theksuar se autoritetet kishin “një sërë informacionësh që tregonin se Leonardi ishte seriozisht i sëmurë” por nuk vepruan.

Ndërsa Deborah Coles, drejtoreshë e organizatës bamirëse Inquest, u shpreh:

“Ky hetim nxjerr në pah pasojat fatale të politikave që izolojnë njerëzit në mjedise të ngjashme me burgje, ku mbrojtjet ekzistojnë vetëm në letër. Të gjithë, veçanërisht ata që kërkojnë siguri, meritojnë të trajtohen me dinjitet dhe njerëzillëk.”

Një zëdhënës i Ministrisë së Brendshme tha:

“Ky ishte një incident tragjik dhe mendimet tona mbeten me familjen e Leonardit dhe të gjithë të prekurit. Po shqyrtojmë me kujdes gjetjet e mjekes ligjore.”