Netanyahu falenderon Trumpin për ‘presionin masiv diplomatik’ ndaj Hamasit, kërcënon me rikthim lufte nëse...

Kryeministri Benjamin Netanyahu vazhdon të kritikojë ashpër analistët dhe gazetarët të cilët argumentuan, siç e thotë ai, "se nuk ka asnjë mënyrë për të rikthyer pjesën tjetër të pengjeve pa iu nënshtruar kërkesës kryesore të Hamasit - që IDF të largohet tërësisht nga Rripi, duke përfshirë edhe zonën tampon, përfshirë edhe korridorin e Filadelfias, si dhe terrenin dominues, me të gjitha implikimet e saj".

Ai thotë se e dinte që nëse IDF shkon në fortesën e fundit të madhe të Hamasit, Qytetin e Gazës, “Hamasi do të dëshirojë të shpëtojë sundimin e tij”.

Netanyahu shton se e dinte që nëse shtohet presion i madh diplomatik “nga miku ynë i madh, Presidenti Trump, ky kombinim i fuqishëm do të bëjë që Hamasi të kthejë të gjithë pengjet tona, ndërsa IDF mbetet thellë brenda Rripit dhe mban të gjitha pozicionet kyçe”.

Ai premton se në fazat pasuese, “Hamasi do të çarmatoset dhe Gaza do të çmilitarizohet”.

Në luftë, thotë ai, “ne po arrijmë fitore masive, fitore që po ndryshojnë fytyrën e Lindjes së Mesme”.

Ai paralajmëron se lufta nuk ka mbaruar dhe mbeten sfida të rëndësishme. Në të njëjtën kohë, thotë Netanyahu, ka mundësi të rëndësishme, "duke zgjeruar rrethin e paqes përreth nesh".

Netanyahu kërcënon Hamasin me një kthim të nënkuptuar në luftë: “Nëse kjo arrihet në mënyrën e lehtë, shkëlqyeshëm. Dhe nëse jo, do të arrihet në mënyrën e vështirë.”/ Times of Israel.