Nepali prezanton plan të madh ndihme për të adresuar pasojat e protestave të ‘Gjeneratës Z’

Qeveria e përkohshme e Nepalit ka prezantuar një paketë ndihmash dhe kursimi shumë të kërkuar për të adresuar shkatërrimin e madh të shkaktuar gjatë protestave të udhëhequra nga të rinjtë e “Gjeneratës Z” më herët këtë muaj, raportuan mediat të enjten, sipas Anadolu.

Protestat e përhapura lanë mbi 70 të vdekur dhe shkaktuan dëme me vlerë miliarda dollarë. Humbja e vlerësuar është pothuajse e barabartë me buxhetin e Nepalit për një vit e gjysmë, raportoi e përditshmja në anglisht Kathmandu Post.

Paketa, e miratuar nga kabineti qeveritar, synon të stabilizojë sektorët e brishtë, të lehtësojë rimëkëmbjen dhe të sigurojë vazhdimësinë e aktiviteteve ekonomike pas protestave të dhunshme që çuan në rrëzimin e qeverisë së zgjedhur të kryeministri Sharma Oli.

Një vlerësim fillestar nga sektori privat sugjeron se vetëm bizneset humbën rreth 80 miliardë rupia nepaleze, apo 563 milionë dollarë dhe gati 15.000 vende të drejtpërdrejta pune u prekën, me turizmin ndër industritë më të goditura.

Paketa e ndihmës përfshin disa lehtësira për të ndihmuar bizneset të rifillojnë aktivitetin. Bizneset dhe institucionet profesionale të prekura nga vandalizmi, zjarrvënia ose grabitja do të përfitojnë një ulje prej 50 për qind të tarifave doganore dhe akcizave për importimin e mobiljeve, makinerive dhe pajisjeve.

Për bizneset e pasiguruara që pësuan humbje, autoritetet tatimore do të njohin vlerësimet përmes procedurave të thjeshtuara, duke lejuar zbritje sipas ligjeve tatimore të vendit.

Masa të tjera përfshijnë kreditë për rindërtim dhe zgjatjen e afateve të shlyerjes si për principalin ashtu edhe për interesin.

Një dispozitë tjetër kyçe e paketës është prezantimi i një Skeme të Mbrojtjes së Pagave për të siguruar që punonjësit në bizneset e prekura të mos mbeten pa punë.

“Kjo masë është krijuar për të parandaluar shkarkimet masive dhe për të siguruar që punëtorët të vazhdojnë të marrin pagat e tyre ndërkohë që bizneset rindërtohen”, thuhej në draftin e qeverisë.

Së bashku me paketën e ndihmës, qeveria ka prezantuar gjithashtu një fushatë të rreptë kursimi për të kontrolluar shpenzimet.

Të gjitha projektet e vogla në nivel provincial dhe lokal janë anuluar, dhe qeveria nuk do të financojë projekte të reja të nisura gjatë këtij viti fiskal.