'U eliminuan 3 narko-terroristë që donin të helmonin amerikanët'/ Trump ndan video të një sulmi amerikan kundër karteleve të drogës

Presidenti i SHBA-së, Donald Trump, publikoi të premten një video në rrjetin e tij Truth Social, duke pretenduar se forcat amerikane kishin vrarë tre “narko-terroristë” që ndodheshin në një motoskaf që transportonte drogë të destinuar për tregun amerikan.

Trump ka raportuar javët e fundit për disa sulme të ngjashme kundër anijeve të dyshuara për trafik droge. Sipas tij, më 2 shtator një operacion amerikan në Karaibe vrau 11 persona, ndërsa disa ditë më pas një tjetër sulm eliminoi tre trafikantë nga Venezuela. Të martën, presidenti republikan përmendi shkatërrimin e një anijeje të tretë, por pa ofruar detaje ose prova vizuale.

Në mesazhin e tij të fundit, Trump tha se forcat amerikane kishin goditur “një anije të lidhur me një organizatë terroriste”, e cila sipas inteligjencës transportonte drogë përgjatë një korridori të njohur të trafikut në ujëra ndërkombëtare.

Uashingtoni ka vendosur një prani të fortë ushtarake në rajon, me shtatë anije luftarake dhe një nëndetëse në Karaibe, si dhe avionë luftarakë e transportues në Porto Riko. Qeveria amerikane akuzon presidentin venezuelian Nicolás Maduro se drejton “Kartelin e Diejve”, një rrjet ndërkombëtar trafiku droge, edhe pse ekzistenca e tij është objekt debatesh.

Ndërkohë, Maduro e ka cilësuar këtë fushatë si një “plan imperialist për ndryshimin e regjimit dhe vendosjen e një qeverie kukull të kontrolluar nga SHBA-ja”.