Marc Márquez, ‘hakmarrje’ në Misano dhe festim në stilin e Messit

Marc Márquez kishte vetëm një mendim këtë fundjavë: të fitonte në pistën e Misanos. Pas rrëzimit në garën e shkurtër të San Marinos, kur disa tifozë italianë festuan me gjeste provokuese fatkeqësinë e tij – madje edhe Valentino Rossi nuk i fshehu një buzëqeshje të lehtë – tetë herë kampioni i botës ishte i vendosur të jepte përgjigjen e tij në pistë.

Dhe këtë e bëri në mënyrën më të mirë të mundshme. Me një garë perfekte, Márquez siguroi fitoren të dielën dhe tashmë është një hap larg titullit të nëntë botëror, që pritet ta kurorëzojë në Çmimin e Madh të Japonisë.

Një festim ikonik

Pas triumfit, spanjolli e kishte menduar edhe mënyrën e veçantë të festimit. Përballë tifozëve italianë të grumbulluar nën podium, Márquez ngriti veshjen e tij, duke imituar gjestin historik të Leo Messit në “Santiago Bernabéu” në vitin 2017, kur argjentinasi tregoi fanellën e Barcelonës pas një goli vendimtar kundër Real Madridit.

Ky ishte mesazhi i Márquez për publikun italian: një shfaqje force dhe personaliteti, në shtëpinë e legjendës Valentino Rossi.

Shades of Leo Messi 👕 @marcmarquez93 #SanMarinoGP 🇸🇲 pic.twitter.com/9Q3Sn7PbTw

— MotoGP™🏁 (@MotoGP) September 14, 2025

Deklarata pas garës

Në intervistën për DAZN, Márquez shpjegoi arsyen e këtij gjesti:

“Messi ka qenë gjithmonë referenca ime. Ai ka ditur të përgjigjet me klas në momentet më të vështira, brenda dhe jashtë fushës. Është e pamundur ta imitosh Leòn, por mbrëmë pashë reagimet në rrjete sociale dhe sot ndjeva një energji shtesë. Kisha shumë dëshirë të fitoja dhe doja ta festoja në këtë mënyrë. Jam ende larg Messit, por ky ishte një homazh për të,” – tha Márquez, me një buzëqeshje të qartë në fytyrë.