Irani paralajmëron se sanksionet do të pengojnë përpjekjet për rivendosjen e inspektimeve me Mbikëqyrësin Atomik të OKB-së

Organi më i lartë i sigurisë në Iran paralajmëroi se kërcënimet evropiane për të rivendosur sanksionet e OKB-së ndaj vendit, mund të pengojnë përpjekjet për të rivendosur inspektimet ndërkombëtare në objektet bërthamore iraniane.

Në një deklaratë të dielën, Këshilli i Lartë i Sigurisë Kombëtare — organi kryesor i sigurisë dhe politikës së jashtme të Iranit — tha se Teherani kishte rënë dakord të paraqiste raporte mbi vendet e tij bërthamore në Agjencinë Ndërkombëtare të Energjisë Atomike sipas një marrëveshjeje që mund t'i hapte rrugën agjencisë me seli në Vjenë, për të rifilluar vizitat në vende të caktuara.

Por tha se “këto marrëveshje do të pezullohen” nëse ka “ndonjë veprim armiqësor” kundër Iranit dhe objekteve të tij bërthamore, “përfshirë rivendosjen e rezolutave të Këshillit të Sigurimit që ishin mbyllur”.

Këshilli paralajmëroi më parë se Teherani mund të reagonte duke u tërhequr nga Traktati për Mospërhapjen e Armëve Bërthamore.

Irani bllokoi aksesin ndërkombëtar në centralet e tij bërthamore, pasi sulmet e SHBA-së dhe Izraelit në qershor goditën tre nga objektet e tij kryesore, duke thënë se ndarja e informacionit në lidhje me programin mund ta ekspozojë infrastrukturën e tij ndaj sulmeve të mëtejshme.

Ky veprim i shtyu Mbretërinë e Bashkuar, Francën dhe Gjermaninë të aktivizojnë një mekanizëm që mund të tërheqë sanksionet e OKB-së deri më 28 shtator, nëse Teherani nuk arrin të tregojë se po ndërmerr hapa konkretë për të zgjidhur ngërçin.

Irani dhe IAEA arritën një përparim fillestar në Kajro javën e kaluar, duke njoftuar një marrëveshje që mund të rihapë rrugën për inspektime. Më pas, treshja evropiane përsëriti se Irani duhet të japë llogari për rezervat e tij të uraniumit dhe të angazhohet në bisedime me administratën Trump përpara se kërcënimi i sanksioneve të OKB-së të hiqet./ Blomberg.