Këlliçi shpërthen pas skandalit në Bashkinë Tiranë: Rilindja 2.0 është '5D' , qyteti i kapur nga banditë ordinerë!

Në një postim në rrjetet sociale, deputeti i Partisë Demokratike, Belind Këlliçi, ka akuzuar qeverinë dhe Bashkinë e Tiranës për një skemë korruptive të nxitur nga “Rilindja 2.0”, që sipas tij, është vetëm një version i përmirësuar i skemës “5D”.

Këlliçi shprehet se Arli Naska, ish-drejtues i Drejtorisë së Taksave dhe Tarifave Vendore, ka ngritur gjatë viteve një arkë paralele ku përfshihen ryshfete, favore dhe përdorim i taksave për presion dhe shantazh duke kthyer hapësirat publike në mall tregu dhe buxhetin e Bashkisë në burim për interesa elektorale.

Deputeti kërkon që autorët të ballafaqohen me drejtësinë dhe se skema e akuzuar të shembet që tani jo si një rast sporadik, por si përgjegjësi institucionale që godet çdo ditë qytetarët.

LEXO EDHE: AUDIO/ Hapësirat publike dhe abuzimet me taksat, përgjimet që zbulojnë rrjetin e inspektorëve

Postimi:

Rilindja 2.0 e pompuar gjatë muajve të verës nga kryeministri, rezulton të jetë thjeshtë një upgrade i skemës 5D!

Rrjeti i korrupsionit në Bashkinë e Tiranës, sapo çeli kapitujt e ri!

Arli Naska, një ndër drejtorët e 5D, i amnistuar nga “heronjtë e fëmijëve tanë”, na befasoi mbrëmë me skemën e ngritur në vite prej tij, për të vjedhur arkën e buxhetit të Bashkisë Tiranë!

Pamjet dhe materiali audio i publikuar në emisionin “Piranjat” në Syri TV, tregojnë qartë atë që kryeqytetasit e kanë ndjerë çdo ditë: hapësirat publike janë kthyer në mall tregu, taksat janë përdorur si armë shantazhi dhe zarfet nën dorë janë bërë ligji i heshtur i inspektorëve bashkiakë.

Në qendër të kësaj skeme korruptive që ka lulëzuar për 9 vite me radhë qëndron Arli Naska, tashmë ish-drejtues i Drejtorisë së Taksave dhe Tarifave Vendore në Bashkinë Tiranë. Pikërisht aty ku duhej të mblidheshin të ardhurat për shërbime publike, u ngrit një arkë paralele e ryshfeteve dhe favoreve në këmbim të votave!

Kjo nuk është thjesht një aferë zyrtarësh të vegjël, apo inspektorësh të korruptuar. Ky është një mekanizëm i ndërtuar me qëllim për të kapur paratë e qytetarëve, për të dhunuar hapësirat tona publike dhe për të vjedhur të ardhurat e bashkisë Tiranë.

Kjo skemë duhet të shembet deri në themel dhe Bashkia Tiranë duhet çliruar përfundimisht nga këta banditë ordinerë.
Përgjegjësit duhet të japin llogari para drejtësisë.